零下13度薄紗拍攝　昆凌憶3年前凍暈經歷

台灣天王周杰倫（周董）同老婆昆凌2014年結婚，先後育有一女小周周（Hathaway）及囝囝Romeo，短短三年已經湊成好字！日前昆凌接受訪問時回憶起3年前第一次喺紐約參加時裝周，嗰時佢要幫某時尚品牌拍攝春夏服裝，而咁啱又遇正紐約10年來最低溫，要喺零下13度穿着薄紗喺海邊拍攝，之後再轉到暖氣好強嘅地方。

昆凌指自己係好怕凍嘅人，當時對佢嚟講係一場硬戰，每日工作都排到好密，完全唔係平時睇到只係打扮到靚一靚去睇鍾意嘅品牌咁輕鬆，就算攰到暈倒，起來都要再繼續工作，冇得休息，搞到昆凌都搞笑話：「我再也不要來紐約了。」真係聽到都戥佢慘慘豬呀！