黃翊自嘲收皮　趙學而：大吉利是

歌手趙學而、黃翊出席商場活動，今次是兩人首次同台演唱，學而表示得知與黃翊一齊表演，事前好緊張，她說：「因為黃翊係零瑕疵歌手，佢唱歌穩定性好勁，我入行時佢已經係唱得好勁，所以我咪緊張囉。」

學而坦言之前在網上看到黃翊復出樂壇唱歌片段瘋傳，剛巧黃翊是她網上平台朋友的朋友，她就搵到對方並私訊說：「黃翊，我好掛住你。」因為當年她做主持訪問黃翊時，私下接觸溝通過，她覺得對方好Funny好Happy，她說：「我係好掛住佢咁樂天、開朗嘅性格。」

黃翊表示當年認識樂而，是對方做娛樂新聞主持的時候，他說：「嗰時我都未知學而咁唱得，直至佢推出啲歌，我真係好留意呢個女仔。」學而笑說：「黃翊今日係咁畀高帽我戴。」

學而跟黃翊都有計劃於2018年舉行大型演唱會，學而笑言有得開就好了，黃翊則說：「2018年我5條嘢（50歲），喺入『五』人生裏面做到自己想做嘅嘢，做過一單叫值威過吓嘅嘢，好似里程碑，畀阿仔睇吓。」兩人做完活動就收爐，黃翊笑說：「係呀，我收皮！」學而笑說：「啋，啱啱出返嚟就收皮，大吉利是。」他笑言百無禁忌，學而笑說：「佢話今日啫！」今晚他們都會跟家人倒數慶祝，兩人亦寄望新一年樣樣都好。