為錢乜Job都接？林盛斌發表殺手論回應網民

藝人林盛斌（Bob）係娛樂圈多仔公，所以佢都好努力工作賺奶粉錢，可以話係百足咁多爪，不過新年流流Bob就為咗工作而勞氣，仲喺微博發長文回應攻擊佢嘅網民！事源有朋友轉發一個討論區嘅內容畀佢，大致係話佢為咗錢乜Job都接，仲話佢連一間信譽唔好嘅公司嘅Job都接埋嚟做。

呢件事令Bob忍唔住逐點回應網民，仲發表「殺手論」：「其實，我同所有演藝界嘅同業一樣，都會出席唔同嘅公開或私人活動，而工作目的只有一個，就係娛樂大眾，無論幕前或幕後，大家都會做好自己本分，令客戶們滿意，大家又開心，當然每一次大家都會簡單了解一下客戶資料及活動性質，但係如果你問有冇好詳盡及詳細去了解佢哋個老闆係咪好人，啲同事係咪衰人，係咪賤人，間公司啲資金點嚟，平時佢哋有冇呃人，咁真係非常抱歉，冇。

依家個感覺好似係，一個被懷疑係變態嘅冷血連環殺手，有一日佢整親隻手，然後去咗互不相識嘅跌打師傅嗰度醫番好，跟住個跌打師傅就畀嗰班受害者家屬同街坊話係人渣。

如果你認為我一早已經知道某某老闆係大壞蛋，而我又知道佢間公司係做好多衰嘢去呃人，但係我又好配合去幫佢哋，等佢哋可以再做多啲衰嘢去呃更多人，咁未免有少少侮辱我嘅人格。

當然，依家有網友話咗畀我知，我會去查證一下，了解一下，假若結果屬實，咁如果下次佢哋再邀請我，我會慎重考慮出席與否。」