開騷堅緊張!JW冧爆男友:見到佢定番晒

2018年01月07日 02:16
東網電視
更多新聞短片
JW真係識講嘢,男友聽完應該冧冧豬!

歌手王灝兒(JW)首次在紅館舉行演唱會,騷後在後台受訪,她表示獲男友Tarzan及很多好友來支持,講到在台上多謝前老闆黎明(Leon),問到可有邀請對方來捧場?她表示:「A music嘅manager有嚟,但Leon好忙嚟唔到,但以前公司同事都有嚟支持。」講到今次只開一場,她表示很想再開,覺得今次太快就完成,但講到舞台設計落重本,問到可怕公司會賺唔到錢,甚至蝕錢?她坦言:「公司同做concert嘅人都係想做好件事,冇諗賺錢,純粹想大家睇好嘅演出,所以賺唔到錢。就算要用好貴嘅嘢,佢哋都照做,好多謝佢哋。」

講到淋水濕身一幕,問到可有着晒泳衣打底?JW表示:「嗰件衫已經係打晒底,我都覺得個part好震撼。(唔怕冷親?)冷親我可以捱,但反而最驚雨水滴落我塊面度唱唔到歌,但試咗幾次都ok,聽到啲觀眾歡呼我都好滿足,幾凍我都覺得抵晒。(今次係你自己嘅idea?)我哋有一齊睇啲reference,唔記得係Adele定Beyonce。」她又表示今次練了兩、三個月舞,問到之前可有表演過給男友睇?她表示:「冇啊。(佢今日都係第一次睇?)係呀。(佢頭先睇完之後對你有咩評價? )佢proud of我,我都好開心,每次我緊張,但見一見佢我就定番。(點解頭先唔喺台上多謝佢?)有啲嘢在心中,唔需要每次講。」講到她的歌衫不太性感,她笑言:「我唔係行性感路線,我係女人味,啲衫我都好鍾意。(男朋友唔畀你性感? )唔係呀,同埋我唔係特登行性感路線,整體靚我就好開心。」