失婚生瘤算甚麼!黎瑞恩寧做「聲聲夢裏人」

2018年01月14日 00:01
東網電視
更多新聞短片
一人有一個夢想~

成世人流流長,有冇諗過自己有乜夢想?25歲前結婚生仔、30歲上車有個安樂窩、40歲高薪厚職、50歲UnUn腳等退休,做個高端人?又或者…… 你從來都冇夢想,見步行步、得過且過、日日食、玩、瞓等壽終正寢,做個低端活死人?其實食、玩、瞓都好講條件,若果你唔係富二代,含住金鎖匙出世,都幾難做到。歌仔都有得唱「一人有一個夢想」,冇夢想同條鹹魚有咩分別?主唱的黎瑞恩夢想就係唱歌做歌手,但可惜……呢個夢想對佢嚟講一直都係這麼近、那麼遠。

闖入豪門又出關

學古巨基話齋,小恩子真係好鍾意唱歌,8歲入屯門兒童合唱團唱Choir,見有歌唱比賽就報名參加,直到1989年喺一個歌唱比賽奪冠,幸運地遇上伯樂、香港著名音樂人安格斯,從此改變佢一生,幾經轉折簽約寶麗金,喺九十年代,同劉小慧、湯寶如、王馨平、周慧敏合稱五小花,夢想開始成真。

但好景不常,當年喺呢個圈,事業同愛情豈能兼得? Nuts哥見過唔少失敗例子。小恩子於1997年邂逅富家公子曾智明,為免戀情見光死,做足多年隱形女友,但未入門前,夫家對於小恩子販賣色相作幕前演出睇唔順眼,曾公開以「歌女」形容小恩子,嫌棄之情溢於言表!之不過小恩子認為喺對的時間遇上對的人,就係一生幸福,甘為愛情犧牲歌唱事業,放棄夢想解約退隱,由屯門一腳踏入九龍塘做豪門少奶奶。

小恩子向來都係一個有堅持、目標清晰、對未來充滿期盼嘅人,從佢嘅歌《發誓》、《陽光路上》等都隱約聽得出佢嘅心聲。有次Nuts哥同小恩子聚會,講番佢一段揸車的經歷,有故事得嚟,亦可以睇得出佢嘅做人態度。

大雨跣胎遇猛男

話說小恩子一向有司機管接管送,但佢從來好少動用司機,擁有中港車牌嘅佢每次北上神州,都鍾意自己揸車穿州過省。Nuts哥曾問過佢一個女人仔,唔驚咩? 佢就話:「唔擔心,我揸得好小心,唔會飲酒揸車,亦唔會超速駕駛。我都算幾幸運,未遇過碰瓷黨!」

同唱歌一樣,小恩子揸車就係有呢份堅持,不過有次驚險事,就令佢記憶猶新。小恩子話有次揸車同幾個朋友去第二個省份,當時滂沱大雨,座駕跣入泥田河床,突然有數名大漢倏地現身,問佢使唔使幫手?小恩子腦中閃過一絲不安:「又風又雨,突然有幾個男人問使唔使幫手,係咪壞人嚟㗎?」不過好彩最後只係小恩子諗多咗,嗰幾個男人當時夾手夾腳用繩拉番佢哋架車上地面,小恩子一心用錢酬謝對方,但對方連聲拒絕,只謂路見不平,拔刀相助而已。

過盡千帆,離婚後嘅小恩子雖然洗盡鉛華,但「歌女夢」未完,機會嚟喇,45歲嘅佢終於可以全力再戰樂壇! 失婚算甚麼?胰臟生瘤又算甚麼?點都撲熄唔到佢團火。Nuts哥試過喺討論區見到有網民將黎瑞恩寫成黎「端」恩,只因佢曾經被遺忘,但心懷高端夢想,又那怕喺低端嘅香港樂壇輕鬆立足呢?