年底返港讀書　爾冬陞：個女持外國護照

導演爾冬陞（小寶）、惠英紅及林家棟到紅磡出席《ViuTV x 第37屆香港電影金像獎頒獎典禮》記者會。

爾冬陞被追問「秘做老竇兩年」，他起初不欲多談，最終在記者連番追問下才說：「其實呢件事都幾大感受，喺我媽媽未過身前，我已經決定唔要小朋友，我家族已經有好多下一代，有小朋友要負責任，但我追求自由，我窮一生精力想掌控自己命運，但發覺做唔到。同太太（前妻羅曉文）發生嘅事，我對佢有遺憾，因為喺埋一齊二十幾年，有緣有分，只不過行唔到最後，我哋唔似TVB劇咁，事實上世上有啲人係會愈行愈遠！」

小寶坦言起初不接受小生命來臨：「新生命開始嗰陣，我接受唔到，亦都感到震驚，我上個月剛剛60歲，既然小生命嚟到，解決唔到，就要面對、反思同處理，自己喺呢行努力多年，好多目的已經達到，但人生意義究竟係乜，一直好迷惘，但迷惘都要行，可能上天就係想畀責任我，令我有新體驗，屋企多小朋友，但同自己嗰個係唔同，睇住佢（BB）有驚喜，我亦重新學習咗好多嘢，最初係唔想要，依家係接受，佢兩歲幾，25個月大，講出嚟係因為佢大啲我都會帶佢出去玩，始終都要講，個女係持外國護照，計劃年底返香港讀書。（女友係之前傳過緋聞嘅王婷？）一定唔係，係圈外人，但我唔想曝光，佢喺內地住。（女友年輕過你好多？）留番下集先講啦！」

培育新人接棒《金像獎》

另外，談到與ViuTV合作，他說：「今屆第一年畀ViuTV直播《金像獎頒獎典禮》，佢哋有鼓勵創新、創意同多元化嘅精神。（同無綫合作唔開心？）唔係，前兩屆都好精彩，但呢個係政府資助要投標，價高者得嘅項目。（唔怕ViuTV欠缺呢方面經驗？）唔會，佢哋好多人都喺呢行好多年，而且我哋會提早協商準備，成個節目係設計出嚟，唔係即興，今屆都會搵新主持，呢個係每年賣點，但依家唔透露得住。」

爾冬陞又透露希望在完成香港電影金像獎協會董事局主席任期前的計劃：「金像獎上兩屆加入咗新編劇，依家創作小組有二十人，我2019年將會離任，希望做到擴大創作班底，等多啲年輕人參與，因為舊人已經『滑晒啞』，需要新人接棒。」

----------------------------

東網巨星開咗ig喇，大家快啲follow啦！

https://goo.gl/KGuo2N