詩詠傳續約換獎　宣萱失落視后：有恭喜佢

藝人宣萱出席零食店開幕活動，談及日前台慶頒獎禮，她表示事前亦工作未能確認必定會出席，但事後有觀看重播。講到唐詩詠獲得視后時，她表示有傳訊息恭喜對方：「雖然佢事前嘅信心都唔係好大，同埋起碼《不懂撒嬌的女人》有個代表攞獎，其實現場邊個攞都冇所謂，每個人都有努力過。（好多人覺得你係民選視后？）咁每個人都有支持自己嘅fans。」

感激伯樂梁家樹

有指唐詩詠因提前續約無綫而奪得視后，宣萱笑言：「每年都有人傳㗎啦，我99年攞獎嗰陣都有傳。」提及汪明荃在頒獎禮上提及「山頭文化」時，她認為十分平常，就算在普通寫字樓工作都會有，最重要的是人夾人，埋堆不是為了擦鞋，而自己則被列入梁家樹堆。她表示：「佢教曉我好多事，他會因工作需要而安排合適嘅角色，唔會因為啱傾而隨便安排角色，我20年嚟都冇做過奸角。（無綫應否公開投票人數？）每間公司都有自己嘅規矩，觀眾投票未必係（佔）100%，可能只喺佔少少，喺演員係被動嘅。」

拍《使徒3》要睇對手

問宣萱今年有何計劃時，她笑言：「有合適劇本嘅話就會拍。（拍《使徒行者3？）睇對手啦，阿Mo（陳豪）飾演的角色已經死咗。（馬國明頂上？）我同佢唔會係飾演一對嘅。（你會唔會提議畀公司？）之前我都有借你哋支筆話想要Chilam（張智霖）或者古仔（古天樂），《使徒3》應該今年成唔到事，可能出年啦。」她對於現時仍然有人叫自己「Mall姐」表示開心，因為有人會記得自己扮演的角色，而劇集亦深入民心。