愛主動出擊！焦媛自爆有戀父情意結

藝人焦媛即將與河國榮合演舞台劇《我愛比爾》，故事講述80年代上海女生戀上外交官的一個悽美愛情故事，劇中略有火辣場面。今次雖是二人首次合作，但已默契相當。問到焦媛為何「睇中」河國榮，她坦言：「當然以前有睇過佢嘅舞台劇演出，而今次我哋要搵個識講流利廣東話嘅外籍人仕，所以非佢莫屬，我諗住下次就同佢合作演音樂劇。」

一人分飾四角冇難度

至於一人分飾四角的河國榮對演戲素有熱誠，他透露：「焦媛扮演嘅上海女生先後同四名外國人發生感情，我就一個人扮演晒四位外籍人仕，想喺對白、舉動上都有分別，等觀眾睇得清楚啲，例如其中一個角色我會只用一種聲調講對白。雖然我跳舞冇焦媛咁叻，但都做咗好多準備功夫，兩星期前開始節食減肚。」

拍過一次拖

對於愛情，焦媛直言自己的態度與今次角色很類似：「都係嗰種喜歡就會極力爭取嘅性格。（過往多人追？）講出嚟都冇人信，我拍過一次拖咋。（即係對高志森一見鍾情？）第一眼覺得係呢個囉，咁都feel到佢有意思，我有戀父情意結㗎！」

河國榮同太太玩師生戀

至於河國榮則難忘初戀謂：「18歲嗰年喺澳洲嘅女友舉家搬去第二個地方生活，當時正值聖誕，我就匿埋喊足幾個星期，女友最終梗係冇咗。」雖是外國人，河國榮內心性格傳統似中國人：「愛情唔會主動出擊，怕畀人拒絕，又驚畀朋友笑。（點追太太？）佢本身係我學生嚟，可能佢想跟我免費學英文啦，不過佢個算盤打唔響，因為我咁耐以嚟淨係講廣東話﹗」他更直言未有打算返回澳洲生活：「30年前嚟香港，我放棄晒所有家當嘞，不過爸爸已經75歲，身體唔係幾好，農曆新年後我會返去同佢過生日、探吓佢。」

----------------------------

東網巨星開咗ig喇，大家快啲follow啦！

https://goo.gl/KGuo2N