仔仔中晒招　黃浩然全家戴口罩瞓抗流感

藝人黃浩然今日到電台接受訪問，宣傳熱播中的無綫劇集《平安谷之詭谷傳說》。黃浩然話自己喺劇集中的角色比想像中更有發揮：「好開心套劇喺網上收視都唔錯，好多人都話唔夠膽夜晚自己一個睇，因為初頭有營造好恐怖陰森的氣氛。入面個角色自己都鐘意嘅，雖然呢套係女人戲，好多嘢都係由女性角度出發，但我嘅角色都係有挑戰性，生活喺一班封建嘅村民之間但有個西化嘅老婆，變咗我對住阿爹，村民，老婆都要有唔同變化，發揮都幾大。」他又預告「好戲在後頭」，叫觀眾留意：「後面仲有個高潮，我個角色嘅主力喺後面，希望大家會鐘意。」

另外，佢又分享拍攝該劇時的趣事，他說一班村民在待機時各有活動：「女士會圍埋一齊團購，男士會鋪張塌塌米喺個外景度，通常一cut機就會聽到『呀』一聲慘叫『好大力呀，唔好，細力啲呀！』就係個師傅喺度幫大家推啲舊患啦，好正㗎！」

最近拍畢《果欄中的江湖大佬》，黃浩然大讚題材夠貼地：「係香港第一個以果欄做背景嘅劇集，同埋我哋真係喺廠搭咗個果欄出來，質感好重。」

出名廿四孝爸爸的黃浩然就話暫時會主力陪屋企人：「手頭仲有啲廣告工作，之前已經陪咗小朋友去旅行，因為過年之後要考試，所以過年都會留喺香港。（最近流感肆虐有無擔心囝囝健康？）中咗招喇我啲仔，都有一個禮拜冇返學，不過依家好番晒，全家戴晒口罩瞓，抖氣係會有啲辛苦，但一定要係咁，兩兄弟瞓喺隔籬床，好驚佢哋會互相傳染輪流病嘅話就有排搞，係細佬間學校有個同學仔病先嘅，然後細佬就中招，開始食藥，哥哥又開始有症狀，好彩我同太太冇事，喺屋企我哋除咗食飯都戴住口罩，大家都要保護自己。」