【節目Center】全能型小鮮肉蔡徐坤崛起

內地女星范冰冰嘅細佬范丞丞、曾演出韓國人氣節目《Produce 101》嘅Justin及朱正廷，呢三位高知名度嘅靚仔練習生近日參與內地選秀節目《偶像練習生》，令節目未出街已經Hit爆全城，成為一時熱話，估唔到首播之後，反而由年僅19歲、以個人練習生身份參加嘅蔡徐坤率先跑出！佢除咗喺新一集力壓范丞丞等人勇奪第二名外，其微博嘅粉絲人數仲高達230萬，睇嚟「升呢」做下一個爆紅小鮮肉指日可待！

究竟蔡徐坤有乜咁把炮？首先睇個Look已經攞滿分，皆因佢有靚仔樣又身高一米八，仲要Rap得、跳得又作得，即係識作詞作曲，可謂外表與才能並重，十項全能冇得彈。而佢喺節目中亦曾表演過自己創作嘅歌曲《I Wanna Get Love》，唔單止獲得一致好評，仲獲捧為節目主題曲嘅Center（中心人物），俘虜唔少少女粉絲，人氣爆燈！

不過，突然爆紅亦意味住有被起底嘅機會。唔少網民火速起佢底，發現蔡徐坤喺小學時期曾被選中加入內地當紅小鮮肉組合TFBOYS，分分鐘唔使等到19歲已經紅遍亞洲。但當時嘅蔡徐坤以學業為重而拒絕邀約，並遠赴美國進修音樂，直至2015年先返回內地參與選秀節目，翌年以十人男子組合SWIN嘅成員出道，可惜冇咩回響。

重點係當時參與選秀嘅蔡徐坤眼細細，加埋厚重嘅瀏海，造型娘爆，仲有幾分青澀。估唔到相隔一年後突變為型格韓仔，個樣同衣着打扮都唔同晒，真係「仔大十八變」！對比埋蔡徐坤以前同依家嘅自拍照就更加認唔出佢。有網民仲話佢同前韓國男子組合BEAST成員張賢勝「撞樣」，亦有人認為佢幾似兩大男神南柱赫及陳柏霖，你又點睇呢？

網民有話兒：

ChengXXXyi：聲音很好聽，跳舞也很有力道，難怪是中心！

XXckyHuXX：表演都還沒開始，我已經不能呼吸了。

XXXso_wu：不覺得他超像前BEAST的成員張賢勝嗎？長得像、風格也很像。

HyodyXXX：Pick坤坤！為你打Call，必須出道！

JackWXXX123：星動亞洲開始留意他，沒想到幾年後變化那麼大。

----------------------------

東網巨星開咗ig喇，大家快啲follow啦！

https://goo.gl/KGuo2N