Sweet!陳凱琳爆適當時候喺屋企同嘉穎咀

20180131
東網電視
更多新聞短片
陳凱琳笑言主演的新劇唔敢畀男友鄭嘉穎睇。
藝人陳凱琳(Grace)到電台宣傳熱播中的劇集《平安谷之詭谷傳說》。講到劇集收視理想,但Grace就話不敢讓男朋友鄭嘉穎收看:「我知佢應該冇睇,我叫佢唔好睇,因為我會好緊張佢嘅評價,我覺得自己仲未係好過到佢個關。(係咪驚畀鄭嘉穎睇到同戲入面老公黃浩然啲咀戲?)雖然套戲係民初戲,但因為我喺外國返來思想比較開放一啲,同埋我哋啱啱新婚,要畀觀眾覺得我哋仲係好恩愛所以先會咁啫。(同鄭嘉穎喺屋企都會成日咀?)適當嘅時候喇,咁冇理由嗰頭嗌交轉頭又錫錫㗎嘛。」
睇劇本搵幫拖
Grace又講到鄭嘉穎常常會給她演技上的意見:「佢成日都會同我提到一啲細位上面可以再做得好啲,例如聲線或者動作應該點做。」對於外界有傳鄭嘉穎自年前已經開始幫Grace挑選劇本,Grace就澄清道:「冇,我哋都係好尊重公司畀嘅劇本,公司畀我哋拍嘅劇我哋就會盡力去拍,但係去到有啲場口我唔識處理嘅時候佢(男朋友)係會畀啲意見我嘅。試過有一次都真係想掉個劇本叫佢幫我睇,因為嗰陣好灰心好多人批評,會覺得起碼畀佢幫我睇吓先會唔會好啲,但佢都叫我自己睇咗先,除非覺得有啲場口真係應付唔到再問。其實佢都知我有一排好灰心,拍劇做劇係想娛樂觀眾,如果我係讓觀眾愈睇愈嬲或者唔開心,咁我係咪做緊相反嘅嘢呢?會諗會唔會做戲唔係我嘅範疇。」
挑戰唔似自己角色
Grace表示慶幸自己有堅持:「今次拍呢個劇口碑幾好啦,終於有番啲好嘅回響。(有網民開始讚你?)叫做有進步囉,呢套劇未播之前真係有驚,覺得要打定個底,今次又會點樣畀人話,雖然唔可以話信心返晒嚟,但係已經比以前好,灰心指數係低咗,冇咁灰心。希望觀眾可以接受我做多啲唔同角色,話晒今次嘅角色好多人話好似我本人,但作為演員會好想做啲令人覺得唔似你本人但做得好嘅角色。」