係愛呀！阿嬌賴弘國愈難愈愛

藝人鍾欣潼（阿嬌）喺社交網公布喜訊，佢答應咗男友求婚呀！阿嬌同賴弘國上年十月爆出戀情，阿嬌年紀大過賴弘國4年，仲要係跨國戀，依家仲要修成正果，真係恭喜恭喜！

其實，爆出戀情之後，賴弘國都有好多是是非非係咁爆出嚟。先爆出賴弘國早年同有「空界林依晨」之稱嘅前空姐趙筱葳結過婚，但結婚半年就宣布離婚！之後同阿嬌戀情曝光之後，賴弘國被發現有個「G奶老婆」Wendy，對方仲以「老公」稱呼賴弘國：「半年見一次老公，畢竟他事業做太大。」但原來兩人只係學長學妹關係，冇感情瓜葛！

講過想生BB

對於男友被瘋狂起底，阿嬌都撐盡男友，佢話過：「每個人有歷史，每個人都有過去，唔介意、包容同鍾意咪得囉，最緊要唔好影響到人哋之前嗰個（前妻），唔好騷擾到人。」夠晒大方！

今年一月時，阿嬌同埋好姊妹阿Sa接受東網專訪，問到阿嬌對結婚有冇憧憬，佢當時話：「有嘅，唔想40歲先生BB嘅，好辛苦，唉！暴露咗自己年齡添！（你仲有3年時間。）咁都要佗B㗎，可遇不可求。」估唔咁相隔一個月，就有好消息傳出，真係恭喜晒！