4千學生揀剩11個　王菀之有份去日本交流

歌手王菀之（Ivana）出席一個慈善活動，表示大概30年前參加過該活動的交流大會，她說：「我諗大概30年前就參加過呢個活動，嗰時我仲讀緊北角衛理小學，大概9、10歲左右，喺全港大概4,000個學生揀11個去日本福崗做交流。」

唔捨得爆喊

Ivana指對當年交流會嘅印象十分深刻，更笑言喊到嚇親人：「嗰時喺寄宿家庭住咗大概一個禮拜，不過我就唔記得係咩月份，發生喺小朋友嘅體驗或者旅程係會記一世，記住係好開心。嗰陣時嘅朋友同照顧我嘅家庭都好記得，因為真係太開心，太唔捨得。喺機場走嘅時候喊到直情嚇親啲旅客，以為係拐帶。」

鼓勵其他小朋友參加

Ivana表示活動不經不覺已經三十屆，她亦十分鼓勵小朋友去參與，她說：「我都唔知自己係咪第一屆，亦都唔好意思去Check，我都好想鼓勵其他小朋友去參加呢一個計劃。」Ivana細細個就可以去福崗交流，她覺得自己幸福之餘，亦十分好彩，她說：「嗰時被選出嚟，我覺得係有少少好彩嘅成份，可能塊面圓圓形咁樣幾可愛，人哋搣塊面都開心啲。可以去得面試嘅小朋友，我諗讀書都會勤力啲，或者自己有一啲睇法呀、能力上貢獻到少少，同人哋分享。」

細個已經好怕醜

Ivana直言小時候已經十分怕醜：「我細個已經好怕醜，唔係好主動去同人講嘢，但係唱歌就唔怕醜，自細已經有做合唱團，所以我諗我面試嘅時候，都係用唱歌去話畀大家聽我想用音樂去分享。」

----------------------------

東網巨星開咗ig喇，大家快啲follow啦！

https://goo.gl/KGuo2N