金像獎：白只發台瘟女主角講成女配角

藝人白只和王菀之（Ivana）在尖沙咀文化中心為「第三十七屆香港電影金像獎頒獎典禮」提名名單公布擔任嘉賓。兩人都台上表現緊張，其中白只就將「最佳女主角」錯講成「最佳女配角」，令Ivana聽到眼凸，不過Ivana都出出哋事，一度撕極都撕唔開入圍名單。訪問時，他們均指自己有份演出的電影是心水。提到女友顏卓靈沒份入圍，白只即謂：「唔止佢冇，我都冇！」

提到他們剛才有不少蝦碌位，白只直言緊張：「我自己好期待個名單，以前都係睇手機先知名單，但今次係我哋揭曉，有阿之傍住會好啲嘅，我自己又病病哋，不過見到啲人名好開心。」

提到好友張繼聰做司儀，問有冇醒定貼士，他笑謂沒有：「好期待！（期待佢蝦碌？）唔係，係上幾年都好好，好想睇佢點樣同阿Sa（蔡卓妍）搞氣氛。（想做司儀？）今日咁樣，就知自己好難負責講正經嘢，有飛入場睇都開心。」而Ivana就笑指兩人要做司儀的話，上台或者暈低讀不到稿。

之後，他們透露兩人五月會有舞台劇上演，會做三星期，而劇本更是由兩人加上朱凌凌成員楊偉倫（阿卵）親自操刀，希望觀眾屆時可以睇得開心過癮。