「KC」歐瑞偉勒令Terry戒青蛙

手機遊戲《旅行青蛙》風靡全城，就連歌手容祖兒同埋古巨基都有玩，個個都日等夜等隻青蛙影相返嚟，仲要等吓隻青蛙幾時回家！近日無綫官方Facebook專頁《See See TVB》搵嚟劇集《愛．回家之開心速遞》呢對孖寶舅父「KC」歐瑞偉同埋「Terry」李偉健拍片，喺片中李偉健繼續同佢角色一樣咁不務正業，無啦啦踎低喺草邊唔知搞乜，當歐瑞偉問佢究竟做緊乜，佢竟然話：「舅父，你唔好理我啦！」

答咗等於冇答，歐瑞偉梗係唔會放棄，繼續連番質問李偉健，點知李偉健被歐瑞偉咁問法，顯得好唔耐煩，仲冇啦啦爆句：「你呢啲年紀唔會明㗎啦！」嘩！講到咁，歐瑞偉即時無名火起，反問點解會唔明嘅時候.........李偉健突然起身拎住塊四葉草話：「我隻青蛀有嘢食啦！」

歐瑞偉聽完都唔知發生咩事，臨尾仲出咗幾隻字，溫馨提示大家「切勿沉迷養蛙，Tag一個需要戒蛙嘅朋友！」睇到呢度，唔少網友都好似有晒共鳴咁，因為你身邊總有一個朋友係養住嗰隻青蛙，仲係咁Tag朋友添！

P.S 遊戲介紹：係講隻青蛙去旅行，但玩家要預備食物同埋行李，最重要係要預備埋四葉草畀佢，等佢可以去特別啲嘅地方，就可以影靚相返嚟！

網民有話兒：

Sxxt Fxn： 走，一起去尋找四葉草

Kxxie Lx：戒蛙

Brxxn Lau：切勿沉迷養蛙！

Chxn Wxx Sxxn：Terry真係好正！

----------------------------

東網巨星開咗ig喇，大家快啲follow啦！