相差23年父女戀!唐文龍暗撻10億咪神黃文意

20180213
東網電視
更多新聞短片
真係父女戀!
現年48歲嘅男星唐文龍早前喺無綫劇《溏心風暴3》中偷嗒陳敏之,人氣不跌反急升,更成為全城熱話。入行廿多年,唐文龍甚少傳出緋聞,最為人熟悉係早年因迷信與相戀六年嘅陳少霞分開,以及拍攝劇集《十月初五的月光》時被指力追佘詩曼,直至近年更被傳性向成疑,但佢立即闢謠澄清,早前公開承認喺網上結交圈外女友,但因意見不合而分手收場。
男方主動「抄牌」
自稱單身嘅唐文龍原來已經有着落,可以話係事業、愛情雙收!佢同「十億千金」、無綫36D咪神黃文意(Mandy)暗撻半年,雖然兩人看似並無交集,但據知上年唐文龍重返無綫拍劇,期間喺電視台邂逅Mandy,並即席主動向對方「抄牌」。隨後再用舊橋冧女,透過社交網與女方互動並聯繫感情,加上細心又溫柔,成功抱得美人歸,果然橋唔怕舊,最緊要受!
雖然兩人相差23歲,但無阻戀情發展,仲為保愛苗玩地下情,拍拖都低調過人,女方亦配合向外宣稱單身以掩人耳目。日前,兩人到尖沙咀一間餐廳撐枱腳後,唐文龍即走到街上截的士,隨後急急腳上車離開,顯然唔想引人注目,令戀情見光死!
錯手上載合照
可惜紙包唔住火,上年11月正值唐文龍生日之際,兩人到大嶼山「避世」兼低調慶祝,但Mandy錯手上載合照,相中兩人笑容甜到漏,關係不言而喻!隨後佢秒刪合照,並重新上載一批單人相掩飾,呢批相明顯由男友操刀。而翻查兩人嘅社交網,遍布甜蜜足迹,只見佢哋不時隔空傳情,互相「點讚」對方嘅貼文外,唐文龍亦不時留言冧女友,例如日前女友換新Look,佢賣口乖以「女神」稱呼對方:「女神焗油幾好睇!」女友亦以一句「有CEO焗油」嚟冧爆回敬,Sweet到爆!
----------------------------
東網巨星開咗ig喇,大家快啲follow啦!