Katy奧蘭度布林被好友爆再度復合

荷里活著名男星奧蘭度布林（Orlando Bloom）與樂壇天后前度Katy Perry拍拖10個月後於去年3月宣布分手，不過兩人就掟煲唔掟蓋，兩個月後又一齊出席在荷里活夜店舉行的生日派對。而去年8月，更被fans偷影到二人在洛杉磯睇Ed Sheeran開騷，Katy更坐在奧蘭度大髀上睇騷。後來二人因各有各忙而令戀情再冇下文。不過最近二人的好友就爆他們再次復合！

二人除了近期互like對方的社交網Instagram貼文及留言之外，二人更一同到馬爾代夫度假，而Katy亦被斷正穿着奧蘭度的衣服。有知情者說：「佢哋復合，Katy希望今次能夠成功。佢（Katy）嘗試過，但都唔能夠擺脫佢（奧蘭度）。Katy實在太過關心佢。今次，佢哋會將戀情低調。」

據知二人上月因被見到在馬爾代夫度假而傳再度復合，有指Katy完成杜拜演唱會之後即飛抵當地與愛郎會合，而奧蘭度亦有在社交網透露自己在當地的豪華度假酒店「梳乎」。fans見到二人分開出現馬爾代夫，但同行友人卻tagged了二人同在一度假酒店內。

自此之後，二人就開始差不多互like晒對方在社交網的留言，例如早前奧蘭度於生日期間上載他駕駛一級方程式賽車的片，Katy都有留言：「證據一：點解我怕你手車。」而Katy上載狗仔相時被見到穿上有奧蘭度肖像的恤衫，奧蘭度去年40歲生日時亦有穿上同一恤衫！有fans亦留意到奧蘭度與Katy分別戴上疑似同一頂芥辣黃色的冷帽。