獨門招牌菜！林雪請Celine食「雪式紅燒肉」

藝人林雪與譚芷昀（Celine）屬同一間經理人公司，日前兩日一齊到街市買賀年餸，由林雪親自下廚，親手煮獨門招牌菜「雪式紅燒肉」請小Celine享用。林雪知道Celine鍾意食豬肉，所以特別整紅燒肉這味拿手菜式，紅紅聲好意頭又好味。林雪在街市買豬肉時，Celine搞笑地與檔主講價，結果成功收平一百元，認真厲害。之後Celine去菜檔買蒜頭京蔥等配料，玩得十分開心，好似去了Shopping一樣，滿載而歸。

獨門秘方

估不到林雪下廚非常了得，火喉到、調味準確，其獨門秘方蒜蔥炮製的醬汁，令整道菜色香味俱全。Celine一啖紅燒肉落肚，吃了成碗白飯，Celine說：「我試過同媽咪去街市買餸，呢個紅燒肉我買咗豬肉、蔥、薑同蒜頭，原本買三百幾，後尾轉咗二百四十蚊。紅燒肉好好味呀，多謝晒，Good Job，林雪哥哥。」

招牌菜有段古

「雪式紅燒肉」成為林雪的招牌菜有段古，他說：「我細個好鍾意食肉，見到隔籬整紅燒肉就流口水，成日畀屋企人話我為食，我自細有個願望，等我大個咗搵到食，一定日日煮紅燒肉。到我大個搵第一舊錢就買咗舊豬肉，返去研究紅燒肉，我搵第一次錢係15歲，今年我50幾歲，你諗吓我做紅燒肉做咗幾耐，所以我呢個紅燒肉係幾拿手。」

羅家英都話正

這道菜是好味到羅家英都叫好，林雪說：「喺內地拍戲天寒地凍，我喺現場煮好多紅燒肉畀大家食，一煮就煮幾十斤。羅家英佢有糖尿，唔食肉唔食甜，但佢食完之後返轉頭問我攞多幾舊，第日邊個導演搵我拍戲，我煮紅燒肉你食好冇？」

----------------------------

東網巨星開咗ig喇，大家快啲follow啦！