大文豪上身！周柏豪派利是兼贈字祝福

周柏豪以一哥身份率領連詩雅（Shiga）、鄭融、雨僑、鍾浠文（Zelia）和黎紀君（Christy）食開年飯，寓意新正頭齊齊來「撈起」賺到「盆滿缽滿」，而唯一一個已婚的柏豪就「大文豪」上身，給五女派「有料利是」送祝福。

贊成新一代學整過年傳統食品

六人圍坐一起食開年飯，身為人夫的柏豪八卦各人的過年習俗，更自言最懷念外婆的廚藝：「以前婆婆仲喺身邊時，年年都會去婆婆度團拜，佢會親自整蘿蔔糕、炸角仔。」鄭融稱家鄉是福建人，習俗是會用南瓜來做黃金糕，她今年和同輩親戚打算反傳統為長輩落廚。柏豪對鄭融的做法亦感贊同，他覺得新一代要學習烹調傳統食品，否則相隔一代後便很易失傳，所以識食之餘亦要識得煮。問到柏豪可會下廚？柏豪坦言：「唔好搵新年嗰餐『教飛』，都係留畀專業人士、即係我阿媽同岳母搞，我都係喺梳化瞓吓、睇吓電視，都好辛苦㗎。（咁你太太呢？）佢都係專業人士嚟。」

雨僑自封最Hea新娘

不要以為Shiga是「番書妹」就不懂過年習俗，Shiga自爆去年已親自整蘿蔔糕等新年糕點。Zelia推介糯米肉丸子，以紅燒煮法就是一道很方便的新年菜式，柏豪笑問：「咁幾時煮畀我哋試吓？」Zelia答：「你派咗利是先啦你。」一句話就搞到眾人起哄。當了人夫的柏豪稱與以前分別不大：「大廈保安對我都係咁殷勤。」而三月底就當狗年新娘的雨僑自認最Hea，全盤由未婚夫羅力威話事：「我都未知有乜做，哈哈，好Hea咁，Book咗個場咪請啲人嚟，自己夠鐘咪去囉，因為都係佢搞。」師妹Christy表示與媽媽開了整餅店，之前到台灣上堂學整翻糖蛋糕，以便為客人度身訂造蛋糕。問她可為雨僑炮製結婚蛋糕？Christy即言：「係喎，可以呀。」雨僑像如夢初醒地說：「係喎，完全唔記得要有結婚蛋糕。」

利是内贈字獻祝福

開年飯後當然輪到壓軸環節「柏豪派利是」，柏豪表示：「呢個利是有啲特別，係寫滿我送畀佢哋嘅祝福語，錢嘅大家都有喇，但我嘅祝福大家就未有喇！」五女即大呼：「好值錢呀！」之後柏豪逐個派，五女就心急想知這位「大文豪」會贈大家甚麼。不懂中文的Shiga邊看邊讀：「曾土一曾土？」柏豪即大叫：「睬過你把口咩！」Shiga邊看邊說：「唔係『++--』咩！」Zelia即刻幫拖：「係更上一層樓。」柏豪說知Shiga今年踏入30歲，是人生另一階段，希望她任何方面都「更上一層樓」。

柏豪獲「好」字

Zelia就獲贈一個「LIKE」字，柏豪指因爲Zelia有不少工作都需要在網上獲得很多「LIKE」支持。鄭融就得到「勁歌熱舞」，因大家知道她的歌好聽、舞好睇，希望她2018年在舞台上繼續「火辣」。雨僑獲贈「幸福美滿」，柏豪說：「2018有你嘅人生大日子，幸福美滿係最好嘅嘢。」Christy做餅店老闆，柏豪贈她「一本萬利」，因爲當年他的父親都是生意人，說過靠一個本賺到萬倍利最合心。至於柏豪就獲東網送上「好」字，有「女」有「子」湊成「好」字，柏豪話：「嘩！咁真係好呀，有氣有力，事業好、身體好、新年好喇，多謝大家。」

----------------------------

東網巨星開咗ig喇，大家快啲follow啦！

https://goo.gl/KGuo2N