【當年今日】霆鋒語出驚人Chok爆星二代

要數圈中嘅星二代，相信唔少人都會諗起男神謝霆鋒，佢盡得爸爸謝賢嘅真傳，無時無刻都Keep住個Chok樣，但原來霆鋒5歲嘅時候就已經非常有型，佢當年孖住妹妹謝婷婷一齊上賀年節目表演，仲搞笑咁話自己似足媽媽狄波拉添！

趁住新年，TVB Facebook專頁就搵番一班星二代細個上賀年節目嘅片段，入面有謝霆鋒 、謝婷婷、洪天明、洪天照、洪天祥、洪煦榆，仲有姜大偉囡囡姜依蘭，當時霆鋒只有5歲，而洪天明亦只有11歲咋！雖然佢哋年紀輕輕，但就已經非常淡定，對住鏡頭都絕不怯場，片中霆鋒孖住婷婷扮大頭佛出場，而洪天明就帶領細佬妹舞獅贈興，認真多才多藝！

除咗騷才藝，一班星二代嘅對答都非常過癮。霆鋒一嚟就話自己叻過爸爸謝賢，因為謝賢冇扮過大頭佛而佢有，之後又話自己似足媽媽狄波拉咁，又瘦又細粒粒，真係童言無忌。至於謝婷婷一樣語出驚人，佢被問到鍾意爸爸啲咩嘅時候，就大爆鍾意爸爸食瓜子，氹到全場都忍唔住爆笑！好多網民都大讚霆鋒細細個已經充滿星味，仲話佢兩個囝囝Lucas及Quintus同當年嘅佢好似樣，十足十餅印咁！

網民有話兒：

Adxx Hxxx：霆鋒細粒粒好可愛

Pxxxxu Chxxx：霆鋒真係好有星味， 細細個已經有

Shirxxxy Txxx：Quintus 好像謝霆鋒

Maxxxxe Hoxxx：他們都是星的後代！粒粒都好亮晶晶