隊友伴舞?Cheronna@SG宣布單飛勁興奮

20180218
東網電視
更多新聞短片
Cheronna@Super Girls新年宣布要單飛呀!
靚女組合Super Girls(SG)趁新年率領眾師弟妹余香凝(Jennifer)、廖子妤(Fish)同黎學勤(Jeffery)一班人「柴娃娃」賀新年,又互相分享新年趣事。Yanny試過封利是給爸爸時整蠱對方:「上年新年我畀封大利是佢,將所有銀紙用膠紙黐到好長,好似啤牌咁,佢都好感動,覺得我大個女咗。」Jessica每年都會同媽咪返福建鄉下過年:「我哋嗰邊年三十晚一過12點,大家就會通屋跑,大叫自己喜歡嘅好嘅說話,我會大叫發達喇發達喇錢來喇!」又搞笑指住Aka:「佢就真係好跟足傳統,新年出嚟見佢真係由頭紅到落腳,紅帽紅衫紅鞋乜都紅,好誇張。」Aka新年就預了大出血:「通常年尾我會畀筆錢媽咪辦年貨,加上因為我係表姐,有好多表弟妹,返到去澳門嘅時候,去邊度食嘢我都要請。」Heidi分享說:「我哋條村有樣嘢幾特別,有個好大嘅譚公廟,咁我哋就會去拜譚公爺爺。」
Jennifer賭食物
Fish是馬來西亞人,當地人有新年習俗叫撈起:「撈起時要講好多吉祥說話,講今年想要達到嘅目標或願望,寓意風生水起,我都好想返去撈個起。呢幾年喺香港試過自己整,期望自己來年更好。」Jennifer笑說家中會賭食物:「我哋好搞笑,唔係賭錢係賭嘢食,新年會叫一個好大嘅盆菜,通常都食唔晒,賭輸嗰個就要食晒為止。」
Yanny派利是畀父母
雖然大家都未結婚,但是已經開始向同事派利是和封利是給長輩,Yanny說:「因為可能工作上都開始有派利是,覺得既然我會派利是畀外面嘅人,咁點解唔派畀身邊嘅爸爸媽媽、爺爺佢哋呢?」而Cheronna就十分有心思地用蘿蔔糕代替:「自己未必會派利是,就每年同媽咪整幾十底蘿蔔糕送畀同事同其他朋友,當係一份心意。」隊長Aka又乘機詐型說每年新年都想帶一班隊友回澳門感受過年氣氛:「因為澳門可以放煙花炮仗,如果可以成班女仔一齊喺煙花下面許願都幾浪漫,可惜每年都唔成事。」
Cheronna單飛嗌緊張
問到新年大計,上年剛開始成立自己眼鏡品牌的Jessica就最想繼續做生意密密賺,反而Heidi和Aka就想在演戲上嘗試不同角色,Yanny想嘗試做主持,當問到Cheronna時,故作神秘的她終於忍不住興奮自爆:「我要單飛喇!咁耐以來都好想試吓一個人唱歌跳舞係咩感覺,嚟緊終於有機會,真係好緊張!」其餘四女在旁搞笑謂:「你請晒我哋做伴舞咪唔使緊張囉,不過我哋好貴㗎!」隨即SG卻又立即向粉絲們大派定心丸,Aka說:「可能上年出歌少,好多人以為我哋冇再一齊,其實唔係,今年SG會出番多啲跳舞歌,始終快歌係我哋最鍾意做嘅嘢。」
Jeffery攞正牌溝女
已經有女朋友嘅型男Jeffery就話自己做定準備跪玻璃:「啱啱做咗個旅遊節目真人騷,係溝女節目,去咗首爾、蒙古同西伯利亞俄羅斯,喺當地用Instagram搵女仔帶我哋旅行,仲去咗一個女仔屋企食飯,成功約咗差唔多20個女仔!(有冇女仔對你有意思?)都有啲做咗朋友有聯絡!(女朋友有冇呷醋?)唉,有少少麻煩,不過佢都開明嘅,呷醋就梗㗎啦,個節目仲要情人節播,一定大鑊㗎喇!」
攝:吳文聰、張福宏
場地:a.esthetics、Hair Salon
----------------------------
東網巨星開咗ig喇,大家快啲follow啦!