晒愛女萌照被指串錯英文　周董任性唔認衰

台灣天王周杰倫（周董）同昆凌結婚以來，人前人後都表現得非常恩愛，貴為星二代嘅囡囡小周周與囝囝小小周，雖然經常出現喺父母嘅社交網中，但就極少露出正面照。呢日周董又喺社交網晒出囡囡小周周嘅背影畀大家睇喇！相中小周周着住白色外套背對住鏡頭，散發出小淑女氣質。不過一班網友都將個重點放咗喺周董嘅英文留言度，佢話：「Four sheeps」睇見周董英文出錯，網友梗係要即刻糾正喇，因為綿羊嘅英文「Sheep」即使係眾數，都唔需要加上「s」，同單數一樣，網友都嗌佢快啲搵昆凌指教吓添！

之但係周董見自己嘅英文被糾正，佢唔認衰搞笑回應網友：「不管，就是要s」，呢個咁任性嘅回覆，唔止搞到網友勁開心，仲忍唔住話：「你開心就好」、「是是，小公舉說得都對」，真係估唔到周董都有咁可愛嘅一樣呀！

----------------------------

東網巨星開咗ig喇，大家快啲follow啦！