忙到冇時間結婚！陳山聰新劇孭飛做男一

藝人陳山聰及李施嬅於將軍澳電視城出席新劇《金宵大廈》造型暨拜神儀式。首次做第一男主角的山聰坦言感到開心：「繼上次《同盟》同子羚合作之後，今次同施嬅合作，佢知我做呢個戲嘅男主角都特登就個期同我合作、好開心。」施嬅解釋之前在度期上有問題，現已解決：「王浩信第一次拍我，依家攞咗視帝。我覺得山聰係好勤力，做咗咁多年需要畀番啲機會，畀大家睇到、認同佢嘅演技同努力。睇完個劇本覺得好好，大家都好期待。」

對李施嬅有信心

問到拍住施嬅可會有信心？山聰說：「當然啦！佢做過咁多套戲嘅主角，經驗某程度上比我多。我哋私底下又熟，好多嘢可以調節到。我哋要擺低私底下嘅溝通，用新嘅方法重新去溝通過。」

拍親熱戲唔使備案

二人於劇中飾演情侶，並透露有不少親熱戲，施嬅笑言Ben（袁偉豪）有好多山聰的得意相，屆時要忘記山聰過去的搞笑事。山聰解釋說：「Ben每次都會儲存晒，間唔中會放出嚟，佢Keep咗我哋最多相喺度。」他又謂不用為拍親熱戲向女友備案：「佢都知係工作，而且佢同施嬅都熟，反而冇乜壓力，好輕鬆去做呢套劇。」此外，山聰指今年工作忙碌，暫未決定何時和女友結婚。

--------------------

東網已全面支援360影片及相片，讓你全方位睇盡新聞大事，恍如置身現場，立即登入東網360網頁： http://on.cc/360/

如仍未更新東網App，請按此連結收睇360影片： https://goo.gl/W1ECsS