旋律一樣！Shine新歌同官恩娜鬧雙胞胎

組合Shine為了下星期的紅館演唱會進行宣傳，透露自資六位數出了首新歌《不怕》，作為珍藏版CD推出，更特意找來英國藝術家設計封面，豈知今次竟然鬧出「雙胞胎」事件！

事緣當Shine首新歌錄製完畢之際，才發現Ella（官恩娜）已經在2月中的時候用同一首旋律出了派台歌《寶貝兒》。天佑解釋事件道：「係年三十晚監製何秉舜先生揸緊車返屋企嘅時候，喺電台聽到Ella首歌，發現一模一樣，講番畀我哋知。原來Ella一年幾之前已經攞咗個demo，但係中間因爲生小朋友各樣原因一直冇出首歌，直至到上兩個禮拜突然就派咗台。」

Shine：知道消息好愕然

雖然如此，Shine都希望首歌最後可以出到：「我哋真係好鍾意首歌，首歌亦都好有意思，好希望可以出到嚟畀大家可以聽到。只能夠話真係太巧合，大家知道呢個消息都好愕然，都有問清楚如果繼續出呢首歌會唔會有問題，依家情況都樂觀嘅，就變成咗雙胞胎事件囉，就好似當年嘅《千千闕歌》同《夕陽之歌》咁。」

延伸《燕尾蝶》

講到首歌，天佑說：「我哋同Wyman傾過，大家都好想寫多首係關於呢個社會嘅歌，作為當年《燕尾蝶》嘅一個延續，佢都話好似好耐冇寫過一首嗰種感覺嘅歌，於是佢就用呢個主題去寫。首歌我哋自己都好鍾意，講番十幾廿年後我哋對呢個社會嘅睇法，可能開始要現實啲，但係呢個世界依然都係有好多色彩，係好正面。個歌詞都好有意思，《燕尾蝶》係講緊我哋要去適應個世界，到依家再去睇個世界唔同咗，雖然唔再係好似童話咁色彩繽紛，但係當我哋充滿希望嘅時候，依然係可以保留一啲嘅色彩。」

搞清楚先推歌

據知今次的「雙胞胎」事件是有人擺烏龍，首歌的原創版權是寰亞版權部。而官恩娜所屬的華納唱片於一年多前為她向寰亞取得歌曲版權，可能是因為時間上的偏差而導致有關方面將同一首歌的版權又給了Shine，而造成今次事件。Shine的經理人表示近幾日已經分別和寰亞及華納各自就事件進行商討，但由於適逢新年假期，許多公司部門尚未正式開工，因而暫時未有結論，不過他們認為情況樂觀：「大家都明白係一個行政錯失，華納冇任何做錯嘅嘢，我哋亦都做晒應該嘅手續。大家都係好朋友。Shine嘅新歌即將推出，依家希望事情能夠得到圓滿解決後，先至進行新歌宣傳。」

華納：同Shine嘅關係一直係友好

另一方面，華納唱片的發言人就回應道：「我哋早兩日收到消息指Shine都錄咗呢首歌，先知道鬧咗雙胞胎事件。而華納同Shine嘅關係一直係友好，加上雙方都係喜事，Ella有小朋友，Shine再開紅館演唱會，雖然件事係尷尬，但都冇乜所謂。」

寰亞版權部：現正努力協商

寰亞版權部亦就事件作出聲明：「就旗下作曲人於推廣歌曲demo工作時發生溝通上的錯誤，導致華納唱片歌手官恩娜及Shine使用了相同的旋律進行歌曲製作，現正努力地與華納唱片及Shine經理人公司友好地協商，希望能儘快將問題圓滿地解決。」

----------------------------

東網巨星開咗ig喇，大家快啲follow啦！

https://goo.gl/KGuo2N