不忿被網民攻擊　羅霖生活費吃力唔結就分

現年52歲的「美魔女」羅霖出席餐廳開幕活動，表示對餐廳生意都有興趣，如果有機會都想投資。講到日前她在網上發文惹來與富二代男友J君分手傳聞，問到新一年感情可是有新動向？她表示：「今年要繼續努力工作，本來都以為可以投入感情，但年尾計過條數，發覺3個仔嘅生活費同學費令我好吃力，所以我要努力，連平時唔接嘅登台騷都可能會接，都要練定一、兩首飲歌。」

拒絕求婚

她又講到聽到有些網民不容許她這個年紀的人講愛情，感到不忿：「唔淨係得18、22可以追求愛情，其實咩年紀嘅人都需要愛情，佢哋嘅阿爸阿媽唔通唔需要愛情咩？」她亦講到如果自己剛剛離婚，又只得一個小朋友的話其實會已經再結婚，但因為有3個小朋友，要照顧他們故拒絕了求婚，問到可是J君向過她求婚？她坦言是，但已拒絕了，並謂現時感情事隨緣，與對方做番朋友。

有外國人追

問到現時可有追求者？她笑言：「唔敢講，驚講完嘅人話我『演嘢』，但其實我之前同個仔去法國滑雪時有外國人追求者，但我都係鍾意中國人。」但她謂現時都不想拍拖住，想全力工作賺錢。

前夫畀好少生活費

另外，羅霖又在尖沙咀出席舞台劇《秘密》記者會。身為贊助商的羅霖應邀為舞台劇客串演出，她笑說：「第一次做舞台劇都預咗畀佢哋玩，最驚係畀阮兆祥玩，但有得客串都開心，可以同觀眾互動。」羅霖再被問到與富二代男友J君甩拖一事，她感慨說：「本來今年都真係想發展吓感情，但係個重擔愈嚟愈犀利，發展感情就要投入時間，但係三個仔嘅學費生活費令到我抖唔到氣，所以要全心全力去做嘢。（兒子爸爸有冇負責生活費？）有，但係好少，四份一都冇。所以要犧牲感情，如果冇小朋友，或者得一個小朋友，我就可以即刻結婚，但係有三個仔所以要放棄。」

羅琳透露稍後將會到上海拍攝有關辣媽的綜藝節目，希望能拓展內地市場。

----------------------------

東網巨星開咗ig喇，大家快啲follow啦！

　https://goo.gl/KGuo2N