天生耳仔貼面　蕭正楠教大家奇招解決

做藝人成日都要四圍飛，好多時都需要搞簽證，而藝人蕭正楠今日就喺社交網透露自己要去整美國簽證，佢仲話申請美國簽證嘅證件相要符合兩個條件，第一就係見晒兩條眉，第二就係要見耳仔。

不過蕭正楠就話自己天生耳仔貼面，為要符合以上兩個條件，所以佢諗咗一個好獨特嘅解決方法，而且仲晒埋相畀睇大家添！其中一張相就見到蕭正楠喺耳背黐咗一嚿唔知係紙定紙巾嘅嘢去撐起耳仔，令耳仔唔會再貼面。而另一張就係佢笑到咀歪歪兼留晒鬚嘅正面大頭，唔少網民睇完都話似反面教材多啲，亦有人問：「有鬍鬚ok嗎？」

----------------------------

東網巨星開咗ig喇，大家快啲follow啦！