化身「醉嬌娃」　唐詩詠自爆點都要刷牙瞓

今年齊齊升呢視后的唐詩詠與李佳芯（Ali）日前現身中環Soho，齊齊為新劇《白色強人》首日開工拍攝一場酒吧訴苦戲份，講述詩詠醉倒街頭後打給前夫馬國明傾訴，穿斗零踭的Ali扶住「醉嬌娃」詩詠，舉步維艱險跌！

讚「潮男」好男仔

在新劇中化身「醉嬌娃」的詩詠表示現實中很少飲醉失場：「情緒兩極化時先會飲醉，唔開心嗰陣仲會飲到爆喊，但點醉都好返屋企一定會刷牙先上床瞓！」她又指未試過醉酒後打電話給舊愛，但有收過男士醉酒後打給她，根據經驗最好不要給予對方反應，才能息事寧人。問到前度洪永城有否醉酒後致電她？詩詠直言未見過他醉酒。

講到早前好友拿拿淋介紹男仔給她認識，她笑言是介紹給江美儀：「其實識咗好耐喇，嗰個男仔係DJ，我同佢冇可能嘅！」但又不忘讚對方是好男仔：「佢之前畀人話係『肥版伊健』，依家講佢變潮男，不知幾開心！」

收暗戀者短訊

至於同場形象惹火的Ali透露與馬國明有感情線，但只是傾慕之情，沒有親熱戲，笑言終於「從良」不用拍親熱戲和暴露戲：「喺我嘅演出字典唔一定要呢兩個元素，終於可以好專心咁演戲。」她又表示為配合劇情而飲了少少紅酒，並自爆飲醉後會不停講英文。問會否打電話給舊愛？她說：「只係收過暗戀我嘅男仔飲醉咗打短訊嚟，係咁亂講嘢好奇怪，事後都問番佢係咪飲醉，唔會當係真。」