朋友幫手買驗孕棒　鍾嘉欣自爆：一造就中

藝人鍾嘉欣（Linda）日前宣布再佗第二胎，今日佢就喺facebook開Live分享懷孕心得，佢仲自爆係喺1月1日知道有咗BB添！

驗孕後即刻打畀老公

嘉欣一開始就話：「Hello～好耐冇見喇！」身在溫哥華嘅佢着上白色長袖衫坐喺度做直播，未見佢個肚！嘉欣多謝大家祝福同埋冇忘記佢，佢透露係喺香港知道懷孕，當日12月31日出席倒數活動前覺得好唔舒服，佢話：「當日起身化妝啦，好攰呀，化妝師同髮型師嚟到我屋企，我好攰醒唔到，個肚點解咁脹嘅？咩事呢？我係咪食錯嘢呢？」於是到第二日（1月1日）朋友幫佢買驗孕棒，佢好開心咁話：「我有咗呀，係好Meaningful嘅呢個BB對我嚟講，因為係喺New Year's Day知道！我仲即時打畀我老公，佢好開心好感動！」到佢返到溫哥華後佢再話畀囡囡Kelly知：「我叫Kelly摸吓媽媽個肚，同佢講：『媽媽有咗BB呀』！」雖然Kelly得18個月，但好叻識跟住講「BB」！

一計劃完就有咗

嘉欣透露第二胎係計劃之內，生完Kelly後諗住餵一年人奶，等Kelly長大後可以行得走得，就開始Plan第二胎，但佢笑言冇諗過咁快再有BB：「一講…一造就中，呢啲叫做一擊即中呀！」佢話兩胎都係計劃後就有，好感謝上天，不過就未知係男定女！

分享囡囡搞笑事

嘉欣話囡囡瞓咗覺，但佢都好識做開心Share囡囡搞笑事同向網民騷出相片，佢話Kelly鍾意擒嚟擒去，趁佢唔為意摷晒櫃桶入面啲嘢出嚟擒入去坐喺度，非常搞笑！嘉欣又喺度諗唔知BB出世後，Kelly有咩反應，不過就話Kelly好大方，鍾意Share又friendly，相信好快適應咁話！

第二次做媽媽較淡定

有網民都問嘉欣心情如何，佢就話第二次做媽媽淡定好多，上次唔知做媽媽係咩反應同感覺，唔知成日去廁所係咪正常！不過佢就話今胎比較辛苦，頭三個月時接Kelly放學時試過喺街嘔，攰到好似感冒成日去廁所，所以未有精神專注拍劇，不過嘉欣向大家派定心丸，佢話知道大家好掛住佢，驚以後見唔到佢拍劇，佢笑言：「其實唔會以後都睇唔到嘅，只不過我依家有咗，個肚愈嚟愈大，除非你畀個大肚角色我做，如果唔係我真係做唔到！」佢話對演藝仍然好有熱誠，雖然搬咗去加拿大，但會繼續工作，希望永遠唔會退休咁話，但要畀啲時間佢休息吓，笑言：「我10幾年入面都係日日做啦，都係Take少少Break，唔係好多啫！」佢話等佢生完第二胎再同大家見面，仲預告可能喺4、5月時返嚟香港見大家呀！

坐月跟足傳統

佢笑言雖然係鬼妹仔，但骨子裏好相信東方人嘅療法，坐月一定會跟足傳統。孕前就一直靠「田原香滴雞精」嚟調養身體！做咗Live冇幾耐，嘉欣又再多次1分幾鐘嘅Live，因為頭先係佢首次做facebook live，「擺烏龍」將畫面角度調轉，所以佢急急再開live向粉絲道歉，非常搞笑。

----------------------------

東網巨星開咗ig喇，大家快啲follow啦！

https://goo.gl/KGuo2N