咩話?楊千嬅問古天樂:射嗰時有冇諗起我

20180310
東網電視
更多新聞短片
千嬅終於返TVB拍劇喇!
返嚟啦!返嚟啦!闊別電視圈17年,藝人楊千嬅終於回歸公仔箱,接拍無綫新劇《多功能老婆》,仲同昔日拍檔黃浩然再合作,呢個組合令人相當期待!不過千嬅套新劇就冇咁快出街,為咗止一止大家嘅劇癮,無綫社交平台專頁「myTV SUPER」特意剪輯短片,同大家重溫千嬅過往嘅經典劇集,一齊數吓有邊幾套啦!
第一套不得不提嘅劇集,梗係千嬅首次擔任女主角嘅《外父唔怕做》。當年只得20歲出頭嘅千嬅孖住影帝張家輝做情侶,仲同好戲之人秦沛合作,都咪話壓力唔大。不過千嬅成功克服困難,仲演得唔錯添。雖然千嬅當時個樣好青澀,但演技一啲都唔似新人,令人眼前一亮!同型男古天樂合作嘅《美味天王》中,千嬅盡現搞笑本色,仲試過「語出驚人」問古天樂:「我有問題想問,你射嗰時有冇諗起我?」咁大膽?!聽番清楚原來係問「食嘢有冇諗起我」先啱,唔少網民依家睇番都嚇一跳,真係嚇到個心離一離!
至於唔少網民心目中嘅經典作《美味情緣》裏面,千嬅就同Young到爆嘅林峯合作,當年佢哋兩個飾演鬥氣情侶,發放唔少笑彈,林峯仲有「濕身」演出添!你冇睇錯,真係濕身㗎,皆因其中一幕千嬅唔小心倒瀉水落林峯身上,搞到佢由頭濕到落腳,相當搞笑!雖然呢三套劇都已經播出咗十幾年,但千嬅同三位男神嘅樣貌都冇乜改變,一班網民都大讚佢哋Keep得好好,唔知有冇機會再見到千嬅同佢哋喺公仔箱合作呢?
網民有話兒:
XXmomimoMiXX:嚇死人咩!千嬅講得咁快,講到「食嘢」變「射嘢」咁!
ChanXXXYing:謎底終於解開,原來美味天王同美味情緣都有千嬅。
XXXisChiu:張家輝個認真款好正!
FionaIpWXXX:林峯當時個樣都好細個
----------------------------
東網巨星開咗ig喇,大家快啲follow啦!