拖田蕊妮落水　麥美恩許文軒嘲緋聞有人信

藝人麥美恩（Mayanne）及緋聞男友主播許文軒（Edmond）以「情侶檔」到馬鞍山出席復活節活動，兩人笑言緋聞傳了一年，終於有搵錢Job。現場他們被安排即場煮蛋並餵對方食，Mayanne自認地獄廚神，Edmond本身也不敢吃對方的手勢，但今次Mayanne的燶邊荷包蛋煮得有板有眼，獲Edmond畀八分高分。問Edmond之前有冇試過Mayanne的廚藝？他說：「冇呀！都係打邊爐咋！都唔知佢識煮嘢食。」Mayanne亦笑認最叻是將雪櫃的食材全部放入煲，煮成一品窩：「以前啲男友有試過，但都係驚嘅，哈哈！」

自薦拍《美女廚房》

講到有傳無綫再搞節目《美女廚房》，Mayanne說：「我想去呀！可以令大家另眼相看，好似小儀咁！（你係地獄嗰邊喎！）咁我唔會好似Kary（吳雨霏）咁燒咗個廚房嘅。」Edmond踢爆Mayanne攞生蟹都驚，她即自爆最驚其實是生雞。

自嘲緋聞有人信

兩人又提議可以有更多合作，例如拍旅遊節目，連名都諗好叫《四個酒凹去旅行》，因二人面上都有酒凹：「既然大家覺得我哋合拍，都可以試多啲嘢。」二人又笑言竟然有人相信他們的緋聞，Edmond說：「真係有人信，親戚有啦！仲有田蕊妮都信，之前佢話搵《1+1的深情》嘉賓，我提議叫佢老公杜汶澤，佢即刻話搵我同麥美恩，佢竟然信我哋係真拍拖喎！」