林峯願為千語埋單執屎 七愛宣言最經典！
20180319
東網電視
更多新聞短片
真係分咗手！（資料圖片）
平時儼如連體嬰嘅林峯同吳千語，近年未見「合體」，亦有傳吳千語另結新歡，即屢傳二人分手消息。雖然係咁，但兩位都未肯正面回應「分」訊一事，直至今日林峯終於承認同吳千語分手，正式結束五年情！
七愛宣言勁經典
2012年林峯同吳千語於杭州合拍電影《男人如衣服》而撻着，有傳當時佢哋喺電影煞科K局徹夜談情，同年7月仲拍得喺中環撐枱腳，但惟未有正面回應。喺2013年，林峯為無綫錄影《勁歌金曲》時終於承認同千語拍拖，仲以「七愛冧爆宣言」確立女友對方：「我好愛、好愛、好愛、好愛、好愛、好愛、好愛BB！」成為一時佳話！
當吳千語公主咁錫
林峯自從與千語拍拖後，對女友好似公主咁錫，除安排司機為千語管接管接外，連拍拖放狗，狗屎都會執埋，唔使千語操心！另外，林峯亦多次同千語周遊列國，遍布愛的足迹，甚有風度嘅林峯更有傳幫千語埋單買唔少戰利品。而去年有傳林峯除將市值約8,000萬元的薄扶林複式豪宅加入千語個名外，仲安排佢入住做女主人過同居生活。
傳各有新歡
但可惜2017年中開始，二人關係開始起變化，除咗話因為工作太忙關係冇乜點見之外，仲傳吳千語另結新歡。就連今年農曆新年，林峯同屋企人返廈門過年，林峯竟然攬狗都未見千語蹤影，同時有指林峯因同屋企人以及內地模特兒張馨月同遊主題公園而傳出緋聞。如今林峯親證「分」訊，唔少網友都話林峯終於「甩難」，仲安慰林峯咁靚仔唔怕冇女朋友！
----------------------------
東網巨星開咗ig喇，大家快啲follow啦！