離開《安樂蝸》 林凱恩不捨眼濕濕
20180321
東網電視
更多新聞短片
林凱恩離開咗《安樂蝸》！
前港姐林凱恩憑劇集《愛．回家之開心速遞》飾演「Bonnie」為人熟悉，佢亦有份喺節目《安樂蝸》擔任主持，今日佢喺社交網站透露要離開呢個節目，仲上載多張同狄以達、 林穎彤以及工作人員嘅合照，佢留言：「安樂蝸，入行後第一個主持的節目。兩年的時間，令我由一個小妹妹到今日大家會記得我召喚uncle di，其實真係好開心好有滿足感。我感激我的同伴，台前幕後，設計師，屋主，觀眾們對我的愛及包容！」
林凱恩接受東網電話訪問，佢話不經不覺已經主持《安》兩年啦，係佢入行第一個主持嘅節目，今日係最後一日，之後就講拜拜，佢話：「真係學到好多嘢，之前個人好緊張，但依家放鬆咗，喺節目做番自己，傻吓傻吓咁，加上同狄以達同林穎彤熟咗，大家好似屋企人，好開心。（佢哋點歡送你？）我請食散水飯，感覺好唔捨得，最尾講感受時我都眼濕濕，好唔想停，因為呢一個節目係大家最早認識我，仲早咗過拍《愛》。」林凱恩話雖然離開《安》，但會繼續拍《愛》劇同埋其他劇集，唔使驚喺幕前見佢唔到。
----------------------------
東網巨星開咗ig喇，大家快啲follow啦！