帶同父異母親兄見阿媽 黃秋生:佢好激動

20180327
東網電視
更多新聞短片
今次係真真正正嘅一家團聚!
齋靠一張黑白童年照,現年56歲嘅黃秋生就係咁樣展開咗佢嘅尋親之旅,差唔多用咗一年時間,終於搵到兩位同父異母嘅哥哥,佢哋仲嚟咗香港見吓呢位影帝細佬!
開頭感覺唔相信
秋生接受訪問時表示:「呢次尋親之旅係無心插柳,係有一晚飲咗酒之後,就諗現今科技先進,係咪可以放張同父母嘅合照上網試吓搵呢?之後同BBC做訪問,講屋企呢一part其實好少,不過出咗街之後好多外國人睇到,冇耐就有位外國女士幫手搵咗爸爸嘅家族人名列表畀我,當時我覺得好神奇,訪問出街兩個星期就可以搵齊晒啲資料?開頭係有啲『唔係呀話』嘅感覺,驚訝咁快之餘亦都開心。」
阿媽表現好激動
問到秋生終於同兩位哥哥喺香港見面有乜嘢感覺?佢就話:「見面嘅時候好多嘢講好多嘢傾,佢哋講番以前爸爸喺香港做乜。」秋生笑言與兩位哥哥不停傾不停食,遲早會好似兩位哥哥咁有個大肚腩。除咗探秋生之外,兩位哥哥亦有去探秋生媽咪,秋生媽因為中風行動不便,不過一見到兩位哥哥即刻表現得好激動:「我冇同阿媽講過佢哋嘅身份,唔知點解一見到兩位哥哥,佢就表現得好激動,佢應該係知我同兩位哥哥嘅關係,阿媽好似想講嘢同起身咁樣,見到阿媽咁激動,我都好快拉咗兩位哥哥走人。」
大團圓BBQ
散失多年終於見面,問到秋生喺咁感人嘅場面下有冇喊?秋生表示:「唔會啦!你估《家春秋》咩!我哋約咗遲啲可能聖誕節一齊BBQ,依家兩邊加埋好大family,我都未試過咁多人一齊BBQ。」
唔覺影帝細佬有特別
兩位哥哥突然發現有個影帝級嘅細佬會唔會好驚訝?秋生笑言佢哋冇乜反應:「其實我都係普通人一個,如果係監犯就話特別啫,演藝都係我嘅事業,佢哋同我嘅關係,同身份係冇關,有個哥哥上網睇過我啲資料,見到面之後都唔覺得有乜嘢特別,反而出到街,佢哋見到好多途人搵我合照,佢哋先覺得好得意,仲搞笑話我都要合照埋一份,喺佢哋眼中我嘅演員身份只係錦上添花。」
與兩位哥哥的4日3夜見面之旅,秋生帶咗佢哋去唔少地方玩,其中一日仲撞到英皇集團老闆楊受成,秋生表示楊生好好客,仲請佢哋食飯,不過對於秋生呢個神奇尋親之旅,楊生好似唔多信,仲笑言秋生係咪作古仔整鬼佢。
老闆請食飯
英皇金牌經理人霍汶希(Mani)接受東網訪問,佢指世界上有啲嘢真係好巧合:「今次秋生嗰兩個哥哥喺澳洲嚟香港,係佢哋自費訂酒店,仲要係訂咗英皇駿景酒店,秋生見兩個哥哥時,老闆楊受成咁啱喺附近,秋生就順便介紹咗兩位哥哥畀老闆識,楊生覺得好有緣,經過一輪認識之後,楊生一盡地主之誼,請大家食飯慶祝!」
----------------------------
東網巨星開咗ig喇,大家快啲follow啦!