邊個嚟㗎？湯怡落街測試知名度喪撞板

常識題，究竟湯怡係邊個？有人話佢係歌手，亦有人話佢係「楊怡」、「蔣怡」，甚至係內地女星湯唯嘅親生妹妹，簡直令人傻傻分不清，好亂呀！真‧湯怡話你知，其實佢係一個演員，現年29歲嘅佢已經入行超過10年，拍過唔少電影同網劇，近年仲進軍Youtube界、孖男友洪卓立拍片，分享甜蜜拍拖印記。

為咗測試知名度，湯怡早前親自做街訪，睇吓有幾多人認得佢。話晒湯怡嘅社交網站有成12萬粉絲，當中大部分都係後生仔，以為佢去到大學做街訪實人人認得佢啦，點知撞晒板喎！皆因有唔少大學生見到真人都認唔出，仲有人直接同湯怡講：「你好熟口面。」但就講唔出湯怡個名…畀吓面好喎！屢敗屢戰嘅湯怡繼續搵人做訪問，期間仲畀埋錯嘅貼士搞氣氛，聲稱湯怡係湯唯個妹，估唔到有路人竟然信咗，仲純真地話有聽講過！哥哥…你畀人陰咗喇！

最搞笑係當湯怡訪問「綠衣男」路人時，對方完全唔認識湯怡，仲大大聲咁話：「可能佢喺香港唔出名。」當時企喺隔籬嘅湯怡好尷尬，不過佢相當大方，完全冇表現出唔開心或者嬲嬲豬。最後「綠衣男」終於知道訪問佢嗰個就係湯怡，即刻面露尷尬神色並死撐話自己只係搞笑，認真爆笑呀！瘀咗唔緊要，因為湯怡一一同被訪問嘅路人合照，仲擺埋上網多謝大家支持，真係好親民、好Nice！難怪唔少網民睇完條片都話對湯怡加晒分，仲有人話本身唔識湯怡，但見佢靚女又好人就即刻變粉絲，所以話「而我不知道湯怡是誰」又點，最緊要有人Like！

網民有話兒：

ChungXXX：試過搭地鐵見到湯怡，驚為天人，靚女到要望完再望！

AndXXXNg：真係跑得嘅長跑演員。

XXXerchan：而我不知道湯怡是誰XD

XXiMingLXX：點解我見唔到湯怡？？？

KamChiXXXai：湯怡係洪卓立女朋友。

----------------------------

東網巨星開咗ig喇，大家快啲follow啦！

https://goo.gl/KGuo2N