Katy港騷學廣東話意外重重　最後叻到教粉絲

（新增內容及圖片）

33歲美國天后Katy Perry昨晚首度襲港於亞洲國際博覽館開騷，熱情到爆的她全晚多次想學講廣東話，不過意外多多，兩度揀中只識講普通話的粉絲，最後倒轉做老師，教河南粉絲用廣東話講：「我愛你！」

Katy昨晚唱完頭幾首歌就除衫騷Body，上衣有LED燈牌，寫住「HOT」同「COLD」兩字，她即場問台下粉絲：「點用普通話講熱同凍？」場內傳出噓聲之後，她即醒水表示：「係廣東話！」不過仍點中內地粉絲學錯師，她即時耍冧，自言受時差影響，更即場倒立，表示就係咁天旋地轉！而她之後都學到熱同凍嘅廣東話，獲粉絲尖叫支持！

她中場雖然學識講「多謝」，但表示再想認真再學廣東話時，就應該請個講流利廣東話的粉絲上台，全場粉絲見到有機會上台埋偶像身，即時叫到拆天，更有一個男子突圍跑上台自告奮勇，不過Katy就唔多Buy，表示要她揀中先得：「你唔可以就咁走上台，本身應該踢你落台，但我都好愛你！」最後Katy另揀咗個戴藍色假髮，男扮女裝的忠實粉絲，幾經辛苦由座位走上舞台，點知對方竟然都係唔識廣東話的，係個來自河南的粉絲！雖然全場傳出噓聲，不過Katy都勁Nice，與粉絲慢慢傾！男子講到身上的嬌俏服飾來自淘寶，Katy表示唔多明，最後聽到阿里巴巴先知道，而男子雖然教到Katy講河南話，但Katy仍然好落力試學廣東話，卒之於全場粉絲幫忙下，學識講「我愛你」，仲索性教埋河南粉絲講，相當識做！她更表示：「我知有個字全球都識，就係『Selfie』！」講完即同粉絲影合照，Sweet到爆！

而河南粉絲最後激動落淚，向Katy表示全場有不少內地粉絲，而內地有更多粉絲未落到香港睇Katy開騷，不過都好愛她！Katy即感動以普通話連講4次「我愛你」，承諾好快會去內地開騷！