有新歡！梁靖琪撻有米紋身小鮮肉

35歲藝人梁靖琪（Toby），自2014年初與結婚半年的富貴老公Aaron離婚後，身邊一直不乏追求者。之前曾經傳Toby搭上貌似溫家偉的「巨胸」新歡陳基燊，不過Toby就一直否認。之前Toby曾經透露自己嘅擇偶條件，話自己唔使大隻靚仔，不過口裏說不，身體卻很誠實，原來Toby情歸叫Jon嘅紋身小鮮肉。

雖然Toby一直將戀事低調處理，將新戀情冚到密密實實，想保護愛情小幼苗，但就百密一疏畀友人喺社交網Post相唔小心出賣咗！

相中見佢哋一大班朋友去布吉旅行，着住泳衣嘅Toby同紋身大隻仔黐到實一實，好親密咁，今次想唔認都唔得喇！據知紋身小鮮肉年紀過Toby一截，不過男方家底唔錯，而且最重要嘅係佢哋有好多共同興趣添！

Toby對於新戀情透過短訊回覆東網說：「感情生活想保持低調，都係以事業為重，我現在生活得好開心，多謝大家關心！」