洪卓立再拍台劇　夥拍賀軍翔演萬人迷

由鍾欣潼、賀軍翔、洪卓立（Ken）主演的台灣偶像劇《動物系戀人啊》日前正式播映，由於劇集題材新穎，通過對動物習性的分析，與人們戀愛時的性格匹配，開播一個禮拜已經好評如潮。劇中，Ken飾演賀軍翔的好兄弟史傑森，雖然是一個萬人迷，不過就是搞笑個種，一向走靚仔文青feel的阿Ken要演搞笑能手，被網友大讚：「每次見到洪卓立就忍唔住笑。」所以套劇一出，阿Ken在社交平台的fans數目即刻升到「巴巴聲」。

至於今次去到台灣拍劇，洪卓立表示原來劇組班底同2009年他拍台劇《王子看見二公主》時基本上是一樣，他說：「當時香港、台灣兩邊走，最後就大病咗一場，完成唔到部劇。今次埋咗班後先知原來就係嗰部劇嘅班底，所以好開心，班crew都好開心，亦都好錫我。」除此之外，講對白對阿Ken來說都是一大挑戰，他說：「好耐都冇試過拍一套劇係全講國語，所以自己都好緊張，開拍前同拍攝期間，都喺度苦練國語。」