赴日影婚紗相！李偉健孖未婚妻拖手祈福
20180410
東網電視
更多新聞短片
李偉健就快同圈外女友拉埋天窗喇！
無綫處境劇《愛．回家之開心速遞》裏面飾演Terry嘅藝人李偉健，即將與圈外女友拉埋天窗，兩人早前仲去咗日本京都上賀茂神社影婚紗相。今日李偉健喺社交網上載婚紗相，見佢同女友喺神社入面着上日本傳統禮服，兼跟足當地禮儀為太太舉傘步入神社，然後二人手拖手再去祈福，畫面好有愛。之後佢哋仲換上另一套禮服喺櫻花樹下留倩影，真係好浪漫。不過李偉健用卡通圖案遮住太太個樣，無法一睹真面目，網民紛紛話好神秘呀！
東網聯絡上李偉健，問佢點解選擇去日本影結婚相？佢表示：「我同未婚妻都覺得和服好特別，同埋鍾意日本啲景靚（櫻花季）。（去咗幾耐？除咗影相仲有做其他嘢？）去咗八日左右，不過主要去做一啲和婚儀式同埋影相，剩番少少時間去幾個旅遊景點咋。（點解未婚妻唔出鏡？）因為佢係圈外人，比較怕醜唔想出樣，之前都冇出樣。」
----------------------------
東網巨星開咗ig喇，大家快啲follow啦！