漢洋生日收防曬 ：驚我曬一曬出雀斑

歌手漢洋早前生日，往年佢都會大排筵席宴請好朋友，但今年竟然玩低調，佢話：「因為出年我都50歲，諗住出年先大搞，加上呢排忙緊舞台劇，所以都係朋友請我食飯，都唔係我做主動。（唔慣？）冇，反而咁樣最舒服，感覺溫暖啲，同埋大家都知我忙舞台劇，所以都唔敢灌醉我。」

問到漢洋收到最有心思嘅禮物係乜嘢？佢笑言：「有個朋友知道我犯太歲，所以好有心思送咗個蛇嘅頸鏈畀我。最好笑係有個朋友送防曬畀我，唔知係咪因為我年紀大，驚我曬一曬就出雀斑，叫我出街一定要搽。」講到生日願望，漢洋希望身體健康，同埋籌備咗好耐嘅音樂計劃可以實行。