畀咗錢幕後？夏雨同3位女主角有床戲

藝人夏雨、米雪、李司棋及阮兆祥出席舞台劇《秘密》記者會，即場與觀眾鬥演技送禮物，場面熱鬧。談到該劇4月底公映5場，眾人表示已進入密鑼緊鼓的綵排，試過一天排練10小時，一向注重養生的米雪有煲湯、沖茶及帶備健康食物到場，而夏雨則準備滿枱食物為大家打氣補給。李司棋笑言綵排後返家「成個人散晒」，阮兆祥即買口乖表示可以充當「骨仔」，且於台上爆夏雨「大鑊」謂：「佢應該畀咗錢幕後，同三位女主角都有床戲及吻戲！」

談到門票所餘無幾，夏雨不清楚會否加場，但透露已有巡迴演出正在洽談中。他指屆時囡囡會專程返港捧場，同時「投訴」米雪等「好嚴」：「講漏一個字台詞都即刻出聲指正，不過有時做Live個腦會有幾秒空白、兜得到咪得囉！正式演出做乜都冇人阻止到，我打兩個空翻都得。」米雪則笑謂綵排自己很難忍笑：「佢哋啲表情好搞笑，搞到我睇司棋及關菊英對戲笑晒，到排我畀夏雨鬧嘅戲，我都忍唔到笑。」

----------------------------

東網巨星開咗ig喇，大家快啲follow啦！