金像獎：威到盡！47歲古天樂大熱稱影帝

47歲的古天樂威到盡，於《第37香港電影金像獎頒獎典禮》憑電影《殺破狼‧貪狼》以大熱姿態首奪最佳男主角，一償影帝夙願。今年絕對是古仔豐收年，除了先後奪得《第12屆亞洲電影大獎》最佳男主角、《第12屆香港電影導演會》最佳男主角、微博給力電影男主角、電影網站票選最佳男主角外，又成為演藝人協會會長，如今古仔再奪香港金像獎，連奪5項影帝殊榮，認真威威。

古仔先後3次入圍角逐男主角，今次終作「零的突破」，上台致謝辭詞時他搞笑從口袋掏出「貓紙」謂：「呢幾日好緊張。我成晚坐喺度諗，香港人點樣做好香港電影。睇住楚原叔攞『終身成就奬』，好記得以前喺無綫同佢一齊拍戲，等埋位時我問佢點做個好導演，佢同我講要記住即使埋咗位都要再度，好嘅電影係唔可以放棄嘅。頭先Pauline（茶水姐）攞奬，佢帶畀我太多歡樂。我哋一定要團結，做好香港電影。我要多謝《殺》片所有單位，包括出品方、監製，有日黃栢高送咗個金牌畀我帶住喺身，佢同我講如果日後攞奬，就送番個金牌畀佢，我話好呀，因為佢係金牌經理人。要多謝呢部戲所有演員，大家群策群力，多謝我經理人、支持我嘅人，同埋我屋企人，直到依家都係我阿媽每朝叫起身，我覺得一個人最緊要有家人嘅支持，就等於香港電影要有所有人嘅支持先可以做得更好。」

----------------------------

東網巨星開咗ig喇，大家快啲follow啦！