《降魔的》重聚 何遠東自爆優待陳凱琳

2018年04月16日 08:26
東網電視
更多新聞短片
「阿嫂」又真係唔同啲嘅!

無綫劇集《降魔的》話咁快已經播完大半年,唔少觀眾都話好掛住劇中嘅演員。近期無綫就搵咗有份出演《降》嘅演員拍咗套遊戲節目《降魔的捉妖遊戲》,當中包括馬國明、胡鴻鈞、黃智雯、何遠東等人。尋晚節目播出最後一集,阿東都話好唔捨得,更自爆玩遊戲「放水」畀「阿嫂」陳凱琳(Grace),佢話:「喺節目入面有同其他藝人玩估飲品遊戲,喺估嘅過程入面都會蝦吓佢哋,用杯飲品潑佢哋或者淨係畀佢哋飲到勁少。不過呢,我哋就對Grace好啲嘅,咁佢係阿嫂嚟㗎嘛,對阿嫂係要好啲嘅!」

此外,阿東亦透露大家各有各忙好少時間見到面,難得聚首大家都起勢影靚相,佢仲多謝服裝組:「同黃智雯、馬國明、胡鴻鈞佢哋真係好耐冇見,同埋嗰日我哋去嘅景點又多,而且着得咁靚所以影咗好多相。因為我套衫係新做,我件衫嘅面積都大,可以着得咁靚真係要多謝服裝組!」阿東近期身處內地拍攝劇集,唔少觀眾都話好想快啲睇到佢嘅新作,不過佢就話大家可能要等多一陣:「劇嗰方面上年就拍少咗,今年就會拍多啲㗎啦,嚟緊都會有嘢出街,希望大家都會繼續留意。」