好彩冇事!大女食唔到嘢 陸永老婆嚇餐死

2018年04月16日 11:12
東網電視
更多新聞短片
做家長真係最驚小朋友唔舒服!

藝人陸永嘅太太Reina經常喺社交網上載兩個女嘅生活照,佢呢日就上載大女Hannah戴住口罩嘅相,原來佢病咗呀,Reina留言話:「個傻女幾日吞唔到嘢,佢話喉嚨痛。今日除咗水,佢都係乜都吞唔到…突然諗起前幾日佢啃親,嚇到大喊攬住我話:『我頭先啃親以為會死!』見佢仲可以大大聲喺屋企唱歌,一啲都唔似喉嚨有事,最驚佢唔係喉嚨痛…愈諗愈擔心,即刻就帶佢睇醫生,到底係喉嚨有事定個心有事。」搞到一班愛錫Hannah嘅網民都非常擔心!

不過相隔唔夠一日,Reina再上載Hannah同爸爸陸永食嘢相,兩父女食得好滋味令Reina即時放心晒!而佢仲去妹妹Simsim去咗溜冰,見到Hannah似乎已經冇咩大礙,溜冰時仲好叻女咁唔使人扶,其實Simsim都好叻㗎,佢尾隨喺家姐後面,一樣唔使人扶,Reina留言話:「平衡力都幾好,學踩單車都冇問題!」網民都讚佢兩姊妹可以玩雙人花式溜冰!