同周潤發撞樣!師奶殺手陶大宇當年勁煞食

20180416
東網電視
更多新聞短片
陶大宇當年係師奶殺手!

無綫劇集《刑事偵緝檔案》最近喺深夜重播,唔少觀眾都趁機重溫多年冇拍無綫劇嘅陶大宇及郭可盈嘅演出、反應熱烈,依家已經播到第二輯,唔少觀眾都話好懷念以前港產劇集嘅作風!

當年憑《刑》系列而人氣急升嘅陶大宇係唔少女士及師奶們心目中嘅男神,無綫平台Big Big Channel上載咗佢1996年上節目《城市追擊》嘅精華片段,陶大宇特意殺入師奶聚集嘅街市測試人氣,瞬間變萬人迷!着住黑色樽領、梳咗整潔三七分界髮型嘅陶大宇,步入街市後即引來大量市民重重包圍,除咗九成係師奶外,仲有一成係小朋友,個個排隊爭住問佢索取簽名「集郵」,當中有個女士大膽地畀咗個手提電話陶大宇,叫佢同電話中嘅友人傾偈,人氣指數絕對爆晒燈!

另外,節目仲將陶大宇中學時嘅成績表曝光,自認唔係讀書材料嘅佢笑言:「一分都有喎!」不過行行出狀元,讀書唔好並唔代表人生玩完!原來年輕時嘅陶大宇同國際影星周潤發樣貌生得有幾分相似,佢透露讀緊中三時獲媽咪推薦,參加無綫節目《歡樂今宵》舉辦嘅《似模似樣大賽》,扮演周潤發後入行。睇番佢同周潤發嘅對比照,又真係幾似喎,難怪成為全港師奶殺手啦!

網民有話兒:
Mxxxxs Lxxxg:果然係殺手!
Chxxxo Cxxm:當年真係溝唔少女!
Pxxxy Hxxxo:真係有啲似發哥~
Irxx Lxx:後生時都算幾靚仔。