東方日報C1:爆裙遲大到!陳瀅焗除Bra上陣

20180418
東網電視
更多新聞短片
陳瀅真係超級黑仔王…

藝人陳瀅(Jeannie)昨日出席活動遲足一小時,匆匆到場的她自言經歷重重難關才能趕至,原來Jeannie先遇大塞車,落車徒步趕往會場時再爆裙,未能換裙的她最後搞到要「執生」除Bra真空上陣扮露背裝,「坎坷」又大感內疚的她不禁當場爆喊。

昨日陳瀅與好姊妹劉佩玥(Moon)孖住出席在銅鑼灣舉行的唇膏活動,不過就比原定時間遲足一小時,令現場大批傳媒呆等。原來問題出在Jeannie身上,期間好姊妹Moon先單獨面對傳媒受訪,直至Jeannie趕到,活動才正式開始。由於遲到令活動超時不少,故兩人與司儀的問答環節,回答得甚為簡潔,似乎想盡快完成。

行到腳都損

Jeannie接受訪問時不停致歉,問到遲到原因,她表示經過多重難關才到場,她說:「我由尖沙咀過海嚟銅鑼灣,架車一出到紅隧就已經大塞車,至少塞咗15分鐘,應該係前面撞車,後來我將架車駛去告士打道維園嗰邊,泊低架車行過嚟時代廣場,行到腳都損。」不過沒有最黑,只有更黑,Jeannie步行時竟發現裙子背後的拉鏈爆開,她續說:「我已經即刻叫助手幫我買過條裙,但條拉鏈卡住咗喺中間,我除唔到條裙,依家條裙後面有個窿,我諗住將條裙當露背裝咁着,所以除晒入面嘅嘢,我依家真空上陣,真係又尷尬又內疚。」

披肩遮窿位

問到Jeannie是否向來都如此烏龍?她自言平時也會發生類似問題,但一日之內發生如此多事則屬首次,笑言下次除了多帶一件後備服裝,還要帶定針線與剪刀!Jeannie再次重申:「我係第一次遲到咁多,真係唔好意思,我覺得非常內疚。」說罷即忍不住落淚,助手連忙為她遞上紙巾拭淚,但她仍然淚流不止,Moon見狀亦上前抱抱作安慰。活動後Jeannie即披上披肩遮掩爆裙,在女助手陪同下離開商場,心急往取車的她更行捷徑,穿梭污穢的後巷及街邊攤檔,步行約十分鐘到達糖街取車,她發現記者在場亦揮手打招呼,之後直駛將軍澳電視城開工。

烏龍事多多

其實Jeannie烏龍早有前科,她曾被本報拍得與Moon逛完商場,前往停車場取座駕時失魂魚上身,忘記泊車位置,在停車場內兜兜轉轉四圍搵車,險辣㷫好姊妹。此外,Jeannie又試過拍劇時將手機亂放,最後因藏在楊秀惠篋內而引起軒然大波。

更多新聞,請瀏覽東方日報網頁:
http://orientaldaily.on.cc/