冇錢交租漏夜走佬!姜皓文「樓」換樓賺凸

20180421
東網電視
更多新聞短片
黑仔苦盡甘來,更應珍惜當下。
要數當今香港影壇奇葩,出爐金像獎「最佳男配角」姜皓文必然榜上有名,人稱「黑仔」嘅佢,年過半百先開始行運,上半生經歷母親早逝,被送入少年宿舍,窮到燶冇錢交租要漏夜搬竇,真係人如其「名」黑過墨斗,點諗到下半生又攞獎,又兩年拍26 部戲賺番有凸,連佢都話:「不嬲唔好運氣,近年運氣好到自己都驚。」早排仲有閒錢喺馬來西亞檳城買咗層樓送畀老婆殷寧(原名金慧英),幾咁開心Share呀!
心口插鐵 股市都跌
睇番往績,黑仔20歲就贏咗亞視第一屆《電視先生選舉》亞軍同才華先生,但之後無以為繼渾噩度日,更加試過零工作量,境況淒涼。
好彩後來遇到王晶執佢入電影圈,由初時等多過做得一組半組,到後來愈來愈多戲,仲幫佢打造咗奸角戲路,直至導演林超賢賞識佢喺《証人》中演反派,黑仔自評「完全改變咗我對拍戲嘅睇法,要對劇本、摸索角色,事前要諗好多嘢」,經此一役後,連對演員出名要求高嘅杜琪峯都搵黑仔演戲,《奪命金》入面凸眼龍心口插住鐵枝猛嗌:「跌呀,跌多啲呀!」堪稱與《大時代》丁蟹同列影視史上兩大狂人唱淡股市經典場面。
百變綠葉 頂走影帝
其後佢仲好似拍戲拍到「鬼上身」咁,乜嘢角色都難佢唔到,堪稱影壇「百變綠葉」,差佬、古惑仔,爛賭老竇、收數佬、過氣拳手等,幾乎講得出嘅角色都撈過,仲着埋Girdle、紫色絲襪演跨性別人士,產量多到嚇死人,入行逾30年嘅佢,舊年喺金像獎仲被攞過影帝嘅曾志偉「葡萄」:「我一部頂你26部!」今年黑仔直頭將佢頂出候選名單,仲捧埋獎,都咪話唔威水!
傷人七分 損己三分
黑仔開晒竅可以追溯十年前以400萬買入大埔2,000幾呎獨立屋開始,間屋家陣升值千幾萬唔在講,連個人都感性到少少嘢都喊一餐,以前喺亞記年代,佢躁狂忟憎無名火到,撞口撞面都想打人幾槌,仲爆咗單打到「老婆」口腫面腫事件添,搞到上埋頭條,家下就老婆前、老婆後, 愛到話唔生仔情願「相依為命」,最近佢仲撈埋唱歌,大唱情歌冧老婆。雖然早前有人問番佢毆打老婆件事,佢誓神劈願話真係冇打過,咁當時究竟發生乜事?黑仔就話過咗咁多年,冇必要再澄清,總之係年少輕狂累事,知錯嘞咁話。即使被人笑話打出真感情又有乜所謂,最緊要浪子識回頭,怕老婆會發圍發達,就當係以檳城樓換老婆當年面上腫起嗰幾幢「樓」囉,大眾可以食花生嘅空間都冇晒啦,亦都令人確信佢今後都唔會再做埋啲咁愚蠢嘅事,以「樓」換樓喎,仲傷過武俠小說入面「傷人七分,損己三分」嘅七傷拳啦,吓話!
---------------------------
東網巨星開咗ig喇,大家快啲follow啦!