吳綺莉知卓林行蹤：希望個朋友對佢好啲

藝人吳綺莉與女兒吳卓林關係時好時壞，早前卓林更孖30歲網紅外籍女友搬出同居，雙宿雙棲，自力更生過活，不過近日傳出卓林已辭工並失蹤數月，吳綺莉遂報警求助，有傳失蹤入口調查組曾聯絡卓林身邊的朋友。消息指吳綺莉二月底報案，警方列作失蹤人口案處理，交由港島總區失蹤人口調查組跟進。

東網聯絡到吳綺莉，提到是否與卓林失去聯絡，令失蹤人口調查組介入調查？她說：「唔想講咁多喇！（卓林依家喺邊你知唔知？）知，佢喺朋友屋企住，希望個朋友對佢好啲，最緊要安全囉！（你幾耐無見個卓林？）幾日前，佢同我講佢唔喺香港，都係嗰句最緊要佢安全和身體健康。（幾日前意思係真係見過卓林本人，定係通電話傳短訊聯絡？）唔想講咁多喇！（依家心情係咪好忐忑不安？）咁又唔係，我有自己生活，小朋友唔喺身邊有好多原因，可以去咗讀書，係一個過程嚟嘅，佢獨立無問題。（知唔知佢依家喺邊度，係做緊嘢定讀書？）唔清楚喇！總之佢最緊要安全健康，應該讀書嘅，做一個健康嘅人。」