元老級扮嘢王！朱咪咪「肥媽」上身勁神似
20180425
東網電視
更多新聞短片
元老級扮嘢王登場！
講起「扮嘢」大家可能都會先諗到王祖藍、李思捷、阮兆祥等人，不過講到「扮嘢」又點可以唔提90年代嘅笑爆肚電視劇《樂壇插班生》呢？近日無綫big big channel就甫番當年江欣燕、黎耀祥、朱咪咪「扮嘢」嘅短片，無論係造型定係把聲都扮到入型入格，唔少網民都話以前嘅回憶返晒嚟，仲話連王祖藍都要去偷師呀！
呢段片係當年《城市追擊》嘅其中一個環節，見到元老級主持林映輝一出嚟就問：「梅姐，今日場電影好唔好睇呀？」就咁睇呢一個「梅姐」嘅背影同身形，又真係有幾分似，再加埋把咁獨特嘅聲線，呢個肯定係梅姐梅艷芳！當大家都坐定粒六以為呢個受訪者係梅姐嘅時候，一轉身竟然係江欣燕，而且佢仲要扮埋梅姐做回應，唔少人都話畀佢呃到透呀！
除咗江欣燕之外，黎耀祥都着咗件白色長袍chok晒聲咁扮羅文，而且仲要大開金口唱《孔子曰》，又真係扮得幾似喎！同場仲加映多個朱咪咪扮肥媽（Maria Cordero）大唱一曲《嘥氣》，見朱咪咪上至髮型，下至撐到隻眼大一大咁唱「得嘅」，加埋佢個勢咁兇狠，仲有邊個夠膽話佢哋唔得？雖然近年都有唔少人都鍾意「扮嘢」，不過扮得咁神似嘅，又真係買少見少，唔知嚟緊又有邊個可以接棒做「扮嘢王」呢？
網民有話兒：
Pcyxxx_Katxx：江欣燕扮梅姐真係冇得頂，如果依家叫佢再扮，唔知仲似唔似？
Loeyxxx1127：王祖藍要睇番喇！真心好睇，番去再睇！
Chaxxx888：朱咪咪嗰個好笑！
haha_kxxx：要翻煲一下！之前無綫好似有重播。
----------------------------
東網巨星開咗ig喇，大家快啲follow啦！