【薯片風波】袁偉豪與行內人各執一詞

睇戲到底可唔可以食嘢呢？如果當你睇得好入神嘅時候，突然傳出一啲開薯片或者食嘅聲，你又會有咩反應呢？

尋晚就有一名自稱行內人嘅網友喺社交網度開火大罵指自己同朋友睇《復仇者聯盟3：無限之戰》食薯片時被一個自以爲天王巨星嘅TVB男藝人叫佢細聲啲，更稱對方態度差：「從好多TVB前輩口中都聽過呢位上位中嘅小生態度非常差，今日親歷其境，未開場我朋友同我傾偈，佢以為我朋友望佢，佢已經用非常唔友善嘅眼神『睥住』我朋友，到電影開始，我係食電影院購買嘅薯片，佢竟然用極差嘅語氣同我講『你細聲啲！』我好肯定我係冇製造任何不必要嘅聲量，丫（阿）巨星不如你表演如何食薯片完全冇聲？你咁驚聽到任何電影以外聲音，你點解唔自己包個戲院睇啦嘛，咁咪冇聲咯（囉）。我又冇講野（嘢）又冇睇電話聽信（訊）息。會有咩聲？而且坐得係（喺）呢個area嘅都係被主辦邀請嚟嘅人，簡稱行內人，你要覺得自己有幾紅先會用咁冇禮貌嘅語氣同人講嘢？真係火都嚟。」此post即引嚟唔少網友留言問係邊個。

不過，好快袁偉豪就喺社交網上轉發並對號入座，佢又發長文反擊，直認該行內人所講嘅男artist就係自己：「請大家不用猜，這幾位行內人所說的人就是我，本來可以靜心去欣賞一場好戲，但後來變成如此收場要讓幾位同行留下不好印象，要讓大家有個不愉快的晚上，首先我表示歉意！但我要澄清一點，我並沒有用不友善的眼神望著（着）你們，我只有對著（着）當時正在進食nachos時把包裝發出聲響的那位朋友在他耳邊輕聲説聲：『唔好意思，可否細聲一點？』這位朋友就回應我一下並且表現得很合作，直至電影最後出字幕的一刻，這位nachos先生旁邊的朋友就向我連聲說道：『咁x巴閉包場睇戲呀嗎！未聽過人講話睇戲不准進食！什（甚）麼大明星！咁X巴閉，點解要攞免費飛睇呀？』等等⋯⋯人之常情，我當刻真的有點火起，但我只有回頭跟這幾位行內人正面説：剛才真係唔好意思，我已經好有禮貌而且在你耳邊細聲說吧！（沒有讓大家失儀的意思）對方説：得！我一定（將事件）擺上網，總之坐咗係（喺）你隔離（籬）嘅就唔係二打六！我跟他點頭之後我便跟我幾位圈中朋友離場！」

之後袁偉豪更指自己冇唔畀對方食嘢，說：「我想再搞清楚一點，我冇唔準（准）你進食！只係想你能為他人設想，進食時細聲一點！讓大家可以專心觀賞電影而已，而且我們都是主辦單位邀請來的賓客更是沒有分高低你我！最後，我不是想和你們有什（甚）麼口舌之爭，只是想為我自己做過的事負上責任，無論你是『行內行外人又或者是什（甚）麼人也好』只是希望大家可以說一點道理和給大家一些基本專（尊）重　多謝」

而袁偉豪此post一出，即獲大量好友及同事留言力撐，其中韓馬利留言謂：「我認識的你，絕對絕對不可能會是這樣態度對人，我100%支持你。」