開騷晒「肉照」！劉浩龍搣甩脂肪變肌佬

歌手劉浩龍（師兄）昨晚（27日）於旺角麥花臣場館舉行演唱會，繼唱畢《94340634》，師兄帶來經典歌《思覺失調》，當音樂一起時，Fans便拍手歡呼，更有的揮動着電話燈，惟師兄一開口唱又「走音」。唱至《思》中段時，師兄將咪遞向台下，與Fans大合唱，又話：「多謝你哋！張飛唔好掉呀！」

其後螢幕出現「老虎機」畫面，師兄就跟住High爆的音樂背景，再脫下紅色長褸，除淨背心白色裇衫，即時惹來Fans尖叫，此時4位身穿同款衣着的男Dancers上台伴舞。帶來一連串勁歌熱舞《師兄》、《Feel So Right》及《Shut up Baby》，師兄在演唱期間蠢蠢欲動想脫下白色背心裇衫，不時用手掀起上衣，少露腹肌吊Fans癮：「幾可跳舞呀我？畀啲反應我！」台下Fans好聽話全部企晒起身，亦見到前女友容祖兒有企埋一份，投入睇騷！師兄最後亦應Fans意思，大方解開衫鈕，大騷6舊「朱古力」腹肌，引來Fans尖叫，師兄亦High爆走勻全台，兼玩獨自Solo舞技！唱畢師兄就好型咁轉身跳落台，留下男Dancers。

騷前師兄曾開心表示於3個月內成功「剷肉」，減走34磅，並預告會於騷內公開對比照。師兄果然言出必行，當他下台換衫時，螢幕Post出他減肥前的「肉照」，並加上旁白話經過地獄式減肥，仲自嘲自己為「貼地歌手」不介意頭又冇梳、又着住孖煙囱上鏡，期後螢幕更Show出師兄減肥「變化史」的照片，旁白笑話：「愈嚟愈貪靚，會戴帽同着番條褲。」最後螢幕兩邊同時登出減肥前、後照。